Almaty qalasyndaǵy «Altyn orda» bazarynyń qyzmetin tekserý barysynda 1 mlrd. 600 mln. teńge kólemindegi zańbuzýshylyq tirkeldi. Bul týraly QR Saýda jáne integratsiia ministrligi saýda komiteti tóraǵasynyń orynbasary Aidar Ábildabekov málim etti, dep habarlaidy QazAqparat.
«Altyn orda» - elimiz boiynsha ǵana emes, Ortalyq Aziiadaǵy eń iri bazarlardyń biri. Aýmaǵy - 28-29 gektar. Ózderińiz biletindei, Memleket basshysynyń tikelei tapsyrmasyna sáikes, Bas prokýratýra elimizdegi saýda oryndary men bazarlardyń qyzmetin tekserýdi mindettedi. Osy oraida, barlyq óńirde arnaiy top quryldy. Onyń quramyna jergilikti ákimdik, salyq, saýda departamenti, básekelestikti qorǵaý jáne damý departamenti men basqa da quzyrly organ ókilderi kirdi. Osylaisha, «Altyn orda» bazarynyń qyzmetin 70 adamnan turatyn top tekserdi. Tekserý barysynda 1 mlrd. 600 mln. teńge kólemindegi kemshilik tabyldy», - dedi Aidar Ábildabekov ortalyq kommýnikatsiialar qyzmeti alańynda ótken baspasóz máslihatynda.
Onyń aitýynsha, tekserý qorytyndysy áli tolyq shyqpaǵan.
«Aitar bolsaq, keibir nysandar zańsyz salynǵan. Atalǵan bazardy tekserýdiń tolyq qorytyndysy bizge áli kelmedi. Óitkeni, jumys aýqymdy. Meniń aityp otyrǵanym - alǵashqy derekter», - deidi ol.
Ministrlik ókili keltirgen statistikaǵa sáikes, búginde elimizde 761 bazar bar, onyń 515-de azyq-túlik satylady.
