Foto: Reuters / Sarah Meyssonnier
Jyl saiyn «Altyn dop» tóńireginde pikirtalas kóp. Biyl júldeni Vinisiýs Jýnior emes, Rodrigo Ernandes alǵanyna tańdanǵan jeterlik. Biri júlde laiyqty oiynshyǵa buiyrmady dese, endigisi Franse Football-dyń naǵyz eńbekti elei bastaǵanyn aitady. Rasymen, Rodri esimimen belgili fýtbolshynyń qandai jetistigi bar? Ol marapattaý saltanaty kezinde qandai málimdeme jasady?
Iá, kópshilik biyl «Altyn dop» Vinisiýs Djýniorǵa buiyratynyna kámil sendi. Kúni buryn quttyqtap, bórkin aspanǵa atqan jankúieri de jeterlik. Alaida marapattaý saltanaty bastalýǵa birneshe saǵat qalǵanda Rodridiń jeńiske jetkeni málim boldy. Sebebi Vinisiýs júlde almaitynyn kúni buryn bilgen «Real» oiynshylary jiynǵa qatysýdan bas tartty. Al «Real Madrid» jyldyń úzdik erler komandasy nominatsiiasynda jeńiske jetken-di. Klýbtyń bas bapkeri Karlo Anchelotti de jyldyń úzdik bapkeri atandy. Biraq saltanatty keshke klýbtyń birde bir ókili qatysqan joq.
Daýys berý nátijesi boiynsha, Rodrigo Ernandes birinshi, Vinisiýs Djýnior ekinshi tur. Odan keiin Djýd Bellingem men Dani Karvahal bar. «Jyl qaqpashysy» ataǵy Emiliano Martineske buiyrtsa, Aitana Bonmati jyldyń úzdik áiel oiynshysy atandy. «Úzdik jas oiynshy» - «Barselona» klýbynyń jartylai qorǵaýshysy Iamin Iamal.
Sonymen, jyl oiynshysy atanǵan Rodri – «Manchester Siti» klýbynyń, Ispaniia ulttyq quramasynyń jartylai qorǵaýshysy. Ol ótken maýsymda «Manchester Siti» klýbymen Angliia chempionatynda top jardy. Biyl Ispaniia quramasymen birge Eýropa chempiony atanyp, týrnirdiń úzdik oiynshysy boldy. Statistika boiynsha, ótken maýsymda 12 gol soǵyp, 14 nátijeli pas bergen. «Manchester Siti» Rodrimen birge 34 oiyn qatarynan jeńilgen joq. Tek jartylai qorǵaýshy alańǵa shyqpaǵan tórt kezdesýde utyldy. Ol klýbtaǵy orny qandai bolsa, ulttyq quramadaǵy salmaǵy da sondai oiynshy. Ispaniia Eýropa chempionatynda 11 oiyn qatarynan qarsylasyn aiqyn jeńdi. Onyń atalǵan týrnirde kórsetken eńbegine, atqarǵan «qara jumysyn» sarapshylar bas barmaqpen baǵalaǵan. Quramdaǵy jas jigitterge bas bolyp, komandanyń irgetasyna ainaldy. Qyzyǵy sol, 64 jyldan keiin ispan fýtbolynyń baǵy janyp, túlegi «Altyn dop» alyp jatyr. Budan buryn Alfredo di Stefano (1957,1959 ) men Lýis Sýares Miramontes (1960) atalǵan júldege ielik etti.
Foto: ballondorofficial
Kishipeiil Rodrigo
28 jastaǵy Rodri áleýmettik jelige tirkelmegen. Qarapaiym ómir saltyn ustanatyn fýtbolshy. Bos ýaqytyn otbasyna, súiikti isine arnaǵandy unatatyn adam. Kásibi mansabyn 2015 jyly «Viliarreal» klýbynda bastap, 2018 jyly «Atletiko Madridke» aýysady. Atalǵan klýb sapynda júrip Eýropa Sýperkýbogyn ielenedi. «Manchester Siti» klýby onyń eýroarenada kórsetken oiynyna tánti bolyp, kelisimshart usynady. Osylaisha, 2019 jyldan bastap álemniń azýly klýbtarynyń birinde dop teýip júr. Áigili bapker Gvardiola onyń oiyn mánerine, oilaý qabiletine tańdanatynyn birneshe ret aitqan. Sóitip, «Manchester Siti» Rodrimen tórt ret qatarynan APL-de top jardy. 2023 jyly Chempiondar ligasy finalynda «Inter» qaqpasyna gol soǵyp, jankúier armanyndaǵy trofeidi Angliiaǵa alyp keldi. Sol jyly klýbtyń trebl jasaǵany taǵy bar.
Iá, onyń alańdaǵy intellektin joǵary baǵalaityndar jeterlik. Qaita túlegen Ispaniia quramasynyń senim artar oiynshysyna ainalǵany da sodan. Ý-shýdan alys, bilgenimnen bilmegenim kóp deitin Rodri bilimin jalǵastyrýdy oilaǵan eken. Biraq Angliiaǵa qonys aýdarǵany, tyǵyz oiyn kestesi qalaýyn oryndaýǵa kedergi jasaǵan. Ol – Kastilia ýniversitetiniń túlegi. Tipti jastar sapynda júrgende mansabyn aiaqtap, bilim jolyna bet burǵysy kelgen. Sátin salyp, «Viliarrealdan» usynys túsip, kásibi karerasyn bastady. Súiiktisimen de ýniversitet qabyrǵasynda tanysqan. Qymbat kólik tizgindep, jarq-jurq etetin jerde júrgendi unatpaidy. Biyl qyrkúiek aiynda «Arsenalǵa» qarsy oiynda jaraqat alyp, maýsymdy erte aiaqtady. Sol úshin «Altyn dop» tabystaý saltanatyna taiaqqa súienip keldi. Keldi de júrek tebirenisin jetkizip, júlde týraly málimdeme jasady.
«Bul jeńis meniki emes, ispan fýtbolynyń mereii tasyǵan kún. Burynyraqta qanshama oiynshy «Altyn dopqa» laiyq bolsa da, qoly jetken joq. Sonyń ishinde Inesta, Havi, Iker Kasilias, Býskets pen taǵy basqasy bar. Marapatym jartylai qorǵaýshylar úshin de qundy. Búgin dostarym habarlasyp, júlde tabystarda fýtboldyń salmaǵy basqanyn, jartylai qorǵaýshy eńbegi baǵalanǵanyn aitty. Sol úshin qýanyshtymyn. Osy marapat jolynda meni demegen, qoldaǵan barshaǵa alǵysym sheksiz. Álemniń eń úzdik klýby «Manchester Sitige», Ispaniia ulttyq quramasyna qurmetim bólek. Olar bolmasa mundai júlde buiyrmas edi», - dedi Rodri marapattaý saltanatynda.
Daiyndaǵan: Aizat Aidarqyzy
