QR Bilim jáne ǵylym ministrligi bólinetin granttardyń sanyn 4 protsentke kóbeitti. Bul týraly búgin OKQ-da ótken brifingte QR BǴM Joǵary jáne joǵary oqý ornynan keiingi bilim departamentiniń direktory Gúlzat Kóbenova málim etti, dep habarlaidy QazAqparat tilshisi.
«Qoldanystaǵy zań boiynsha «Altyn belgi» iegerleri artyqshylyq quqyǵyna sáikes granttarmen qamtylýy kerek. Sol sebepti respýblikalyq komissiia atalǵan sanattaǵy abitýrientterge ýniversitterdiń, QR BǴM men Densaýlyq saqtaý ministrliginiń qarjysy esebinen grant bólý týraly sheshim shyǵardy. Granttandyń sany 4 protsentke, iaǵni 1487-ge kóbeidi», - deidi Gúlzat Kóbenova.
Onyń aitýynsha, «Altyn belgi» iegerleri grantsyz qalmaityn kórinedi. Sonymen birge, ministrlik zańnamany ózgertý baǵytynda jumystardy jalǵastyrmaq.
«Biz kelesi jyldan bastap granttar tek UBT balymen, jetim jáne múmkindigi shekteýli balalarǵa, aýyldyq kvota boiynsha jáne ózge sanattarǵa ǵana bólinetindei jumystardy júrgizip jatyrmyz», - dep atap ótti ol.
Óz kezeginde Joǵary oqý oryndary qaýymdastyǵynyń prezidenti Rahman Alshanov bul másele aýyspaly kezeńge sai kelip turǵanyn málim etti.
«Medal iegerleri granttardan shet qalmaityndai sheshimge keldik. Úkimet osy máselege qulaq asyp, qosymsha oryndar bóldi», - deidi Rahman Alshanov.
