«Altyn alqa» jáne «Kúmis alqa» alǵan analarǵa elimizdiń joǵary oqý oryndarynda bilim alýy úshin arnaiy kvota bólinbek. Bul týraly búgin QR Bilim jáne ǵylym ministri Ashat Aimaǵambetov aitty, dep habarlaidy QazAqparat tilshisi.
«Halyqtyń áleýmettik az qamtylǵan tobyn qoldaý maqsatynda »Altyn alqa«, »Kúmis alqa« ielerine grant taǵaiyndaý boiynsha kvota qarastyrylady», - dedi ministr Senat depýtattaryna «Pedagog mártbesi týraly» zań jobasyn tanystyrý barysynda.
Onyń atap ótýinshe, qazirgi ýaqytta mundai institýt elimizde qoldanysta bar. Búginde múgedekter jáne ózge de sanattaǵy azamattarǵa joǵary oqý ornynda bilim alýyna arnaiy kvota qarastyrylǵan.
«Bizge kópbalaly analardy ónimdi jumyldyrý qajet dep otyrmyz. Eger mundai niet tanytqan adamdar bolsa, onda olar oqýǵa túse alady. Ulttyq biryńǵai test tapsyrýy, shekti ball alýy qajet. Degenmen, olardyń kvotasy bolady jáne qandai da bir jeńildetilgen sharttarmen joǵary oqý oryndaryna túsýge múmkindik alady. Bul rette onlain oqý boiynsha da norma bar», - dedi Ashat Aimaǵambetov.
