Qazaqstan Respýblikasy Ulttyq mýzeii 2020 jylǵy 18 naýryz kúni saǵat 17.00-de Úndistan Respýblikasy Niý-Deli qalasynda Úndistan Ulttyq mýzeiinde «Uly dala: Ýaqyt. Keńistik. Mádeniet» kórmesin ashady.
Kórme Tuńǵysh Prezident - Elbasy Nursultan Nazarbaevtyń «Rýhani Jańǵyrý» baǵdarlamasy aiasynda uiymdastyrylǵan halyqaralyq «Altyn adamnyń álem mýzeilerine sherýi» kórme jobasy aiasynda 2020 jylǵy 18 naýryz - 19 sáýir aralyǵynda ótedi.
Kórmeniń basty jádigeri «Altyn adam» - el rámizderiniń ajyramas bóligine ainalǵan Qazaqstan tarihyndaǵy eń tanymal arheologiialyq sensatsiia. «Altyn adam» 1969 jyly Almatynyń mańaiyndaǵy Esik qorǵanynda arheolog Kemal Aqyshevtyń jetekshiligimen júrgizilgen arheologiialyq jumystar nátijesinde tabyldy. Qorǵannan arasynda kiimderdi bezendiretin detaldar, sol siiaqty áshekeiler men turmystyq zattar bar tórt myńnan astam altyn buiymdar tabyldy. Zertteýshilerdiń qorymdaǵy zattardyń topografiiasyn ter tógip zertteýleri nátijesinde, kórmege usynylyp otyrǵan saq jaýyngeriniń kelbetin jańadan jasap shyǵý múmkin boldy.
Úndistan Ulttyq mýzeiine usynylǵan kórmeden kiimi altyn japsyrmaly jáne jebe, qar barysy, arqar, jylqy jáne qus túrindegi altyn tilimsheler áshekeilep turǵan konýs pishindi erekshe bas kiimdi Altyn adamnyń rekonstrýktsiiasyn jáne osy jas aq súiek saq jaýyngerimen (arheologtardyń pikirleri boiynsha 17-18 jastar shamasynda) birge jerlengen erte temir ǵasyrynyń (b.d.d V-IV ǵǵ.) arheologiialyq oljalarynyń kollektsiiasyn tamashalaýǵa bolady.
Esik Altyn Adamy - halyqaralyq kórme jobasynyń aiasynda álemniń 12 mýzeiinde usynylǵan Qazaqstan Respýblikasy Ulttyq mýzeiiniń basty jádigeri. Kórme Belarýs, Resei, Ázerbaijan, Qytai, Polsha, Ońtústik Koreia, Ózbekstan, Soltústik Makedoniia, Túrkiia, Malaiziia jáne Gretsiiada úlken jetistikpen ótti.
Bastapqy siqyrly máninen airylǵan janýarlardyń sándik beineleri zergerlik buiymdarda, miniatiýra kitaptarda, aǵash, tas jáne súiek naqyshtarynda, sáýlet syndy ortaǵasyrlyq ónerde áldeqaida jinaqtalyńqyraǵan túrde, stildengen oiý, zer elementteriniń pishinin qabyldap qoldanysta qala berdi. Bul úrdister ekspozitsiiaǵa qoiylǵan XV ǵasyrǵa tán dep datalanǵan Sairam kómbesinen tabylǵan zergerlik óner buiymdarynan aiqyn baiqalady.
Kórmede sol siiaqty Taqsai (Batys Qazaqstan oblysy), Taldy-2 (Qaraǵandy oblysy) jáne Berel (Shyǵys Qazaqstan oblysy) syndy saq qorǵandarynan tabylǵan arheologiialyq biregei oljalar da kórsetilmek.
Esik qorǵanynan tabylǵan zattar arasynda ejelgi jazba eskertkishteriniń biri rýna jazýmen jazylǵan jazbasy bar kúmis tostaǵannyń ekspozitsiiadan alar orny erekshe.
Sonymen qatar, kórmege Batys Qazaqstan oblystyq tarih jáne arheologiia ortalyǵynyń arheologiialyq otriady 2012 jyldyń sáýirinde qazba jumystary kezinde tabylǵan «Taqsai hanshaiymy» usynylady. Taqsai qorymynda ǵalymdar 35-40 jastaǵy áieliniń qoǵanyn zerttedi. Onyń qasynda ydystar, sándi bas kiimniń áshekeileri jáne kóptegen altyn buiymdar tabyldy. Ǵalymdar shaiqastardyń kórinisterin beineleitin aǵash taraǵy erekshe artefakt dep sanaidy.
Kórmege Qazaqstan Respýblikasy Ulttyq mýzeiiniń qorlarynan barlyǵy 292 zat usynylady.
Kórmeniń resmi ashylýynyń aldynda Qazaqstan Respýblikasynyń Ulttyq mýzeii men Úndistan Ulttyq mýzeii ókilderiniń qatysýymen baspasóz máslihaty ótedi.
