Biyl Aziia chempiony atanǵan shyǵysqazaqstandyq «Altai» voleibol klýbynyń oiynshylaryna halyqaralyq dárejedegi sport sheberi ataǵy berilmek, dep habarlaidy QazAqparat.
Shyǵys Qazaqstan oblysynyń ákimi Danial Ahmetov «Altai» voleibolshylarymen kezdesý ótkizip, sportshylar men jattyqtyrýshylar quramyn klýbtyq Aziia chempionatyndaǵy jeńisimen quttyqtady.
«Alty jyl buryn biz osy klýbty qurdyq. Voleibolshylarymyzdyń mundai myqty nátijelerge qol jetkize alatyndyǵyna kóbiniń kúdikpen qaraǵany ras. Biraq búginde olar múmkin emes eshteńe joqtyǵyn dáleldedi. El Prezidenti Qasym-Jomart Toqaev QR Mádeniet jáne sport ministrine «Altai» oiynshylaryna halyqaralyq dárejedegi sport sheberi ataǵyn berýdi tapsyrdy», - dedi aimaq basshysy.
Onyń aitýynsha, qazir klýbtyń basty maqsaty – Qazaqstan chempionatynda laiyqty óner kórsetip, 2024 jyly Olimpiada oiyndaryna daiyndalý jáne álemniń eń úzdik klýbtarynyń úshtigine kirý.
«Bastysy aldyǵa asqaq maqsattar qoiýdan jasqanbai, kerisinshe oǵan jetýdiń joldaryn qarastyrýdan taiynbaý qajet. Komandanyń kúsheiip jatqany qýantady. Al ekinshi «Altai» komandasy da qazaqstandyq jarystarda óz ónerlerin kórsetýge saqadai sai. Sondai-aq Semei qalasynda taǵy bir klýb uiymdastyrý týraly sheshim qabyldandy. Óitkeni voleibol óte tanymal jáne kóptegen azamattardyń qyzyǵyp kóretin sport túri», - dedi Danial Ahmetov.
