Elorda ákimi Altai Kólginov ózine tikelei baǵynyshty aýdan ákimi Asqar Esilovtiń jemqorlyq qylmysy úshin otstavkaǵa ótinish berýge mindetti emes. Bul týraly QR Memlekettik qyzmet isteri agenttigi Memlekettik qyzmet salasyndaǵy baqylaý departamentiniń direktory Erlan Saparov aitty, dep habarlaidy "Ult aqparat".
«Ol ýaqytta qala ákiminiń otsavkaǵa ketýin kózdeitin zańdaǵy ózgerister qoldanysqa engizilmegen bolatyn. Sondyqtan bul tetik elorda ákiminiń otstavkaǵa ótinish berýi úshin qoldanylmaidy dep sanaimyz», - dedi Erlan Saparov.
Aita keteiik, «QR memlekettik qyzmeti týraly» Zańnyń memlekettik qyzmetshilerdiń jaýaptylyǵy máselesi boiynsha erejeleri 2019 jyldyń 10 jeltoqsanynda qoldanysqa engizilgen. Oǵan sáikes, oblys, respýblikalyq mańyzy bar qala nemese astana ákimderi óziniń orynbasary, ózine tikelei baǵynyshty memlekettik saiasi qyzmetshi, apparat basshysy ne aýdan (oblystyq mańyzy bar qala), qaladaǵy aýdan ákimi sybailas jemqorlyq qylmys jasaǵan kezde otstavkaǵa ótinish berýi tiis.
Al 2020 jyldyń 17 aqpanynda Esil aýdany №2 aýdandyq sotynyń úkimimen Nur-Sultan qalasy «Baiqońyr» aýdanynyń burynǵy ákimi A.Esilov 515 000 teńge turatyn uialy telefon túrinde para alǵany jáne fýtbol alańdarynyń qurylysy boiynsha qosalqy merdigerlik jumystardy alýǵa járdem bergeni úshin (QK 366-babynyń 2-bóligi) kináli dep tanyldy.
