Nur-Sultan qalasynyń ákimi Altai Kólginov qalanyń sol jaǵalaýyndaǵy Kishi Taldykól jóninde qandai sheshim qabyldanǵanyn aityp berdi, dep habarlaidy QazAqparat.
«Birden aitaiyn, kólge eshkim tiispeidi. Aǵyn sý jinaǵy bolsa da, halyq ony kól dep atap ketken. Taldykóldiń ózinde kóńil kóterý aýmaǵy salynady. Ony kógaldandyryp, halyq serýendeitin jaǵdai jasaimyz. Biraq, sol jaǵalaýda úiler kóptep salynbai turǵanda, munda sarqyn sýlar jinalatyn», - dep jaýap berdi ákim Ortalyq kommýnikatsiialar qyzmetinde tilshi suraǵyna.
Ákimniń aitýynsha, Taldykóldegi sý kólemi qazir azaiǵan. Buryn 50 mln tekshe metr sý bolsa, qazir 8 mln tekshe metr sý qalǵan.
«Elordada qurylys kúsheigendikten, sý kólemi azaiǵan. Taǵy da qaitalap aitaiyn, sý aidynyna eshkim tiispeidi. Al onyń ainalasynda josparlanǵan qurylys jumystary júrip jatyr. Kóptegen úiler salynyp úlgerdi», - dedi A. Kólginov.
