Elorda ákimi Altai Kólginov qalalyq infraqurylym problemalarynyń erekshelikterin atady, dep habarlaidy "Ult aqparat".
«Injenerlik jeliler materialyna qarai 30, 50 jylda tozý ereksheligine ie. Al endi bir materialdar 10 jyldan keiin-aq jaramsyz bolyp qalady. Bul jańaryp otyratyn protsess. Sondyqtan ony únemi jańǵyrtyp otyrý qajet», - dedi Altai Kólginov elorda ákimdiginde ótken qoǵamdyq tyńdaýdan keiin.
BAQ ókilderine bergen suhbaty barysynda qala basshysy mundai problemabarlyq ýaqytta ózekti bolatyndyǵyn aitty.
«Jalpy qalalyq problemalar negizinen jerdiń astynda jatady. Qysta tynysh uiyqtap, jyly jerde ómir súrý úshin jylý jelilerin aýystyrý qajet. Sol siiaqty sý taza bolýy úshin jańǵyrtý júrgizilýi tiis. Bizde jańa eldi mekenderdiń paida bolýyna bailanysty bul máseleler barlyq ýaqytta ózekti bolady. Bir máseleni sheshseń, taǵy ekeýi paida bolady. Bul qala ómiri, soǵan daǵdylaný kerek», - dedi ol.
Ol qala tóńiregindegi turǵyn úi alabtarynyń infraqurylymdyq problemasyn sheshý úshin qansha qarajat qajettigin aitty.
«Bul barlyq máselelerdi úsh jyldyq biýdjette qarastyramyz. Bul biz úshin basymdyq. Turǵyndar ózderin tolǵandyratyn máselelerdi aita bersin. Sebebi barlyq máseleni bir mezette sheshe almaimyz. Qajettilikti qaradyq, bir qaraǵanda 245 mlrd teńge qajet. Muny bir jyldyń ishinde sheshe almaimyz. Bul bizdiń alǵashqy esepteýimiz ǵana. Osyǵan deiin barlyq eldi mekenderdi, turǵyn úi alabtaryn aralap shyǵyp, adamdardy tolǵandyratyn máselelerdi tyńdadyq», - dedi elorda basshysy.
