Ishki ister ministri Erlan Turǵymbaev Qyrǵyz taýlarynda joǵalǵan alpinisterdi izdestirý jumystary jalǵasqanyn málim etti, dep habarlaidy QazAqparat.
«Alpinister boiynsha: keshe 14 tamyzda alpinister Jeńis shyńyna deiin shyqqanymen, 15 tamyzda qar boranyna tap bolǵany habarlanǵan bolatyn. Alpinisterdiń biri qaitys bolyp, ekeýi kómek suraǵan. Atalǵan taý shyńy Qyrǵyzstan aýmaǵynda ornalasqandyqtan, eki kún buryn qutqarý operatsiiasy qolǵa alynyp, qyrǵyz shekarashylarynan áýe keńistigin paidalaný ruqsaty alynǵan. Alaida bizdiń qutqarýshy tikushaq qatty borannyń saldarynan biikke kóterile almady. Búgin jergilikti ýaqyt boiynsha saǵat 10.00-de qutqarý operatsiiasy qaita jandandy. Bortta tájiribeli qutqarýshylar barshylyq. Tikushaq taýly aimaqqa barynsha beiimdelgen», - dedi Erlan Turǵymbaev Úkimet otyrysynan keiin tilshilerdiń suraǵyna jaýap bere otyryp.
Dese de, ministrdiń aitýynsha, teńiz deńgeiinen 6 myń metr biiktikke áýe kemeleriniń kóbi kóterile almaidy.
«Áýe kemeleri barynsha biikke kóterilip, qutqarýshylar izdestirý jumysyn jalǵastyrady. Eń qiyny, alpinisterdiń naqty qai jerde ekenin bile almai otyrmyz. Sondyqtan, barynsha aýqymdy izdestirý jumystaryn qolǵa alamyz. Qazir biz GPS arqyly joq degende boljamdy oryndardy anyqtaý úshin arnaiy qyzmetterdi iske tartyp jatyrmyz», - dedi ol.
Eske salsaq, almatylyq alpinister toby Qyrǵyz taýlarynda joǵalǵan. Almaty qalasynyń ákimi Baqytjan Saǵyntaev taýda qazaqstandyq alpinister tobynyń joǵalyp ketýine qatysty Instagram paraqshasynda alańdaýshylyq bildirdi.
Keiinirek joǵalǵan alpinisterdiń biriniń qyzy áleýmettik jeli arqyly qalyń kópshilikten kómek surady.
Sondai-aq, QR Qorǵanys ministrligi alpinisterdi qutqarý operatsiiasyn bastady.
Sondai-aq búgin Tótenshe jaǵdailar komitetiniń resmi ókili Nursultan Nurahmetov qutqarýshylardyń Tian-Shan taýynda joǵalyp ketken alpinisterdi izdeýge ushyp ketkendigin habarlady.
