Qyrǵyz Respýblikasynyń eks-prezidenti Almazbek Atambaevqa bultartpaý sharasy qoldanyldy, dep habarlaidy "Ult aqparat" «Kabar» agenttigine silteme jasap.
«Almazbek Atambaev 26 tamyzǵa deiin qamaýǵa alyndy», - dep málim etti Pervomai aýdandyq sotynan. Eldiń burynǵy basshysy Memlekettik ulttyq qaýipsizdik komitetiniń Tergeý izoliatorynda bolady.
Ázirge vedomstvo budan basqa túsinikteme bergen joq.
Aqparatty eks-prezidenttiń advokaty Sergei Slesarev ta rastap otyr.
Zańgerdiń aitýynsha, eks-prezident Qyrǵyzstannyń Qylmystyq kodeksiniń 319-babyn (Jemqorlyq) buzdy degen kúdikke ilingeni týraly IIM habar bergen.
Aita keteiik, 7 tamyzda Qyrǵyzstannyń Koi-Tash aýylynda arnaiy jasaq Atambaevty ustaý operatsiiasyn júzege asyrmaq boldy. Alaida burynǵy memleket basshysynyń jaqtastary olarǵa toitarys berdi.
Al 8 tamyzda quqyqqorǵaýshylar taǵy operatsiia bastap, 19.30-da Atambaevty ustady. Keiinirek narazylyq bildirýshiler kúshpen tarqatyldy. Sońǵy derekterge súiensek, eki kúndik qaqtyǵys saldarynan 85 adam zardap shekken, arnaiy jasaqtyń bir sarbazy oq jaraqatynan kóz jumdy.
Atambaevtyń úiinde bolǵan oqiǵalardan keiin Qyrǵyzstannyń Bas prokýratýrasy «Jappai tártipsizdikter», «Buzaqylyq», «Adam óltirý», «Adamdy kepilge alý» baptarymen sotqa deiingi tergeý amaldaryn bastaǵanyn málimdedi. Degenmen, el astanasyndaǵy jaǵdai turaqty ekeni atap ótildi. Aita ketsek, 8 tamyzda Qyrǵyzstanǵa Sholpan atada ótetin EAEO elderiniń Úkimet basshylary kezdesýine (9 tamyz) resmi delegatsiialar kele bastady. «Eldegi oqiǵalarǵa qaramastan, Eýraziia úkimetaralyq keńesi belgilengen ýaqytynda ótedi», - dep málimdedi Qyrǵyz Respýblikasy premer-ministriniń baspasóz hatshysy Ádilet Sultanaliev.
Sondai-aq 8 tamyzda Jogorký Keneshtiń kezekten tys otyrysy ótip, onda el prezidenti Sooronbai Jeenbekov bilik «halyqtyń bólinýine, turaqsyzdyqtyń ornaýyna jol bermeitinin» málim etti.
«Atambaevtyń taraby atys qarýyn qoldanǵanyna qaramastan, arnaiy kúshter atys patrondaryn paidalanǵan joq», - dedi ol.
«Eger keshegi kúnge deiin Atambaevty tergeýge kýáger retinde shaqyrsa, endi oǵan asa aýyr qylmys jasaǵany úshin kúdikti retinde qaraityn bolady», - dedi Jeenbekov.
Budan bólek, parlament otyrysynda depýtat Myktybek Abdyldaev Atambaevtyń úiine shabýyl jasaý kezinde tutqynǵa alynǵan arnaiy jasaq qyzmetkerleri bosatylǵanyn habarlady.
