Foto: Pexels
Almaty qalasy Jetisý aýdanynyń №2 aýdandyq sotynda para berý jáne para berýge deldaldyqqa qatysty qylmystyq is qaraldy, dep habarlaidy «Ult aqparat» Kazinformǵa silteme jasap.
Sotta Almaty qalasy Jetisý aýdany ákiminiń apparaty men «K» JShS arasynda (direktori B.) saiabaqtardaǵy jasyl jelekterdi kútip-ustaý boiynsha memlekettik satyp alý týraly shart jasalǵany anyqtaldy.
Jasyl alqaptardy tekserý kezinde Jetisý aýdany ákiminiń orynbasary R. oryndalǵan jumys aktileri men jumystardyń quny týraly aktige kedergisiz qol qoiýy úshin deldal arqyly para alý nieti týyndaǵan. Óz kezeginde B. bul aqparatty JShS quryltaishysyna habarlaǵan. Osylaisha, R. memlekettik fýnktsiialardy oryndaýǵa ýákiletti tulǵa bola tura, deldal B. arqyly para berýshi M-dan (JShS quryltaishysy) óziniń qyzmettik ókilettigi sheginde áreket jasaǵany úshin 13 785 000 teńge kóleminde para alǵan.
Sottalýshylar óz kinálaryn tolyq moiyndady. Prokýror R. men M.-ny 6 jylǵa bas bostandyǵynan aiyrýdy surady. Sottalýshy B-ny 1,6 jylǵa bas bostandyǵynan aiyrýdy surady.
«Sot úkimimen sottalýshylar R. jáne M. para alý jáne para bergeni úshin kináli dep tanylyp, ár qaisysyna 6 jylǵa bas bostandyǵynan aiyrý jazasy taǵaiyndalyp, ómir boiyna memlekettik qyzmette laýazymdardy atqarý quqyǵynan aiyryldy. Sottalýshy B. para berýge deldaldyq tanytqany úshin kináli dep tanylyp, 1 jyl 6 aiǵa bas bostandyǵynan aiyrý jazasy taǵaiyndalyp, ómir boiyna memlekettik qyzmette laýazymdardy atqarý quqyǵynan aiyryldy. Sottalýshylardyń shyn nietpen ókiný, kinásin moiyndaý, kámeletke tolmaǵan balalarynyń bolýy jáne buryn sottylyǵy bolmaýy jaýaptylyqty jeńildetetin mán-jailar retinde tanyldy. Jaýaptylyqty aýyrlatatyn mán-jailar joq», - dep habarlady Almaty qalasy Jetisý aýdanynyń №2 aýdandyq sotynyń baspasóz qyzmeti.
Úkim zańdy kúshine engen joq.
Eske salaiyq, buǵan deiin Almaty qalasy Jetisý aýdany ákiminiń orynbasary iri kólemde para aldy dep aiyptalǵan edi.
