Áleýmettik jelilerde Almaty qalasynyń jabylatyny týraly taraǵan aqparat shyndyqqa janaspaidy. Bul týraly qala ákimdigi janynan qurylǵan koronavirýstyń taralýyn boldyrmaý jónindegi komissiia málim etti, dep habarlaidy "Ult aqparat".
Áleýmettik jeliler men messendjerlerde aǵymdaǵy jyldyń 30 maýsymy saǵat 00:00-den bastap belgilenbegen merzimge deiin qosymsha shekteý sharalaryn engizý, onyń ishinde iri saýda nysandarynyń jáne jaiaý júrginshiler aimaqtarynyń, saiabaqtardyń, skverlerdiń, qalaǵa kirip-shyǵatyn joldardyń jabylatyny týraly aqparat tarady.
Osyǵan bailanysty Almaty qalasynyń ákimdigi janynan qurylǵan koronavirýstyń taralýyn boldyrmaý jónindegi komissiia atalǵan aqparattyń shyndyqqa sáikes kelmeitinin resmi túrde málim etti.
«Almatydaǵy koronavirýstyń taralýyn boldyrmaý jónindegi komissiia qalanyń resmi derek kózderinde jariialanǵan aqparatty ǵana qoldanýǵa shaqyrady. Sonymen birge, jalǵan aqparatty taratqany úshin jaýapkershilikke tartylatynyn eske salamyz», – delingen habarlamada.
