Almatyda orta bilim beretin uiymdar muǵalimderi arasynda «Almatynyń jyl muǵalimi» baiqaýy bastaldy, dep habarlaidy "Ult aqparat".
Ákimdik taratqan aqparatqa sáikes, baiqaýǵa 5 jyldan asa úzdiksiz eńbek ótili bar orta bilim berý uiymdarynyń muǵalimderi qatysyp jatyr. Mindetti shart – konkýrsqa qatysýshy muǵalim ózin usynǵan mektepte keminde 3 jyl jumys isteýi tiis.
Baiqaý úsh kezeńde mektepishilik, aýdandyq jáne qalalyq deńgeide ótkiziledi.
«Jeńimpaz konkýrstyq komissiianyń baǵalaýy jáne qoǵamdyq pikirdiń qosyndysy arqyly (respýblikalyq telekanalda kórermenderdiń bergen daýystary) anyqtalady. Konkýrstyń mektepishilik kezeńine 205 mektepte 709 muǵalim qatysty. Ekinshi kezeńge árbir mektep 2 jeńimpazdan usyndy. Ekinshi kezeńge qatysqan muǵalimderdiń sany 410 boldy. Qalalyq kezeńge árbir aýdan úzdik 5 muǵalimnen usynady. Sonymen, Almatynyń úzdik jyl muǵalimi ataǵyna megapolistiń 8 aýdanynan 40 muǵalim qatysady», - dedi qalalyq ákimdikten.
Konkýrstyq komissiia pedagogikalyq, psihologiialyq jáne ádistemelik salanyń ǵalymdarynan, respýblikalyq «Úzdik pedagog» konkýrstarynyń jeńimpazdarynan, ardager-ustazdardan, jańashyl-pedagogter, ádiskerlerden jáne qoǵamdyq uiymdardyń ókilderinen quryldy.
Konkýrstyń gran-Pri iegerine «Almatynyń jyl muǵalimi» ataǵy beriledi. Gran-Pri – bir bólmeli páter, I oryn – avtomobil, II oryn – 2,5 mln teńge, III oryn – 1 mln teńge beriledi.
Konkýrstyń jeńimpazdary jyl saiynǵy «Muǵalimder kúni» merekesiniń saltanatynda marapattalady.
«Almaty qalasynyń bilim basqarmasy qala ákimi Baqytjan Saǵyntaevtyń tapsyrýymen jáne qoldaýymen orta bilim berý uiymdary muǵalimderine «Almatynyń jyl muǵalimi» ataǵyn berý úshin konkýrs ótkizip otyr. Bul konkýrs qoǵamda pedagog mártebesin kóterýge, kásibi jáne áleýmettik kelbetin qalyptastyrýǵa, talantty muǵalimderdi anyqtaý, olarǵa qoldaý kórsetý men marapattaýǵa, pedagogikalyq shyǵarmashylyqqa yntalandyrýǵa baǵyttalǵan», - dedi Almaty qalasy bilim basqarmasynyń bilim berýdegi jańa tehnologiialardyń ǵylymi-ádistemelik ortalyǵynyń direktory Andrei Dýpik.
