Jedel-qutqarý jasaǵynyń qutqarýshylary joǵalǵan er adamdy Mámetova shyńynyń muzdyǵynda tapty. Bul týraly TJM habarlady.
«Respýblikalyq jedel-qutqarý jasaǵynyń qutqarýshylary joǵalyp ketken er adamdy Mámetova shyńynyń muzdyǵynan tapty. Búgin muzdyqty tekserý kezinde RJQJ qyzmetkerleriniń jaiaý toby er adamdy tapty. Ol qatty tońyp qalǵan, qutqarýshylar oǵan jyly kiim berdi. Meditsinalyq kómekke muqtaj bolǵan joq. Qazirgi ýaqytta RJQJ jedel toby taýdan týristpen birge túsip kele jatyr», - delingen habarlamada.
Eske sala keteiik, 18 shilde kúni týrist Ile Alataýy taýlarynda joǵalyp ketken bolatyn. Izdestirýdi RJQJ qutqarýshylary alpinizm federatsiiasynyń alpinisterimen birlesip júrgizdi.
