Kóktóbe bókterinde bolǵan órttiń tómengi tusynda taǵy bir oshaq tutandy. Qutqarýshylar bir adamnyń máiitin tapty. Bul týraly Almaty qalalyq Tótenshe jaǵdailar departamentiniń basshysy Serik Áýbákirov málim etti, dep habarlaidy "Ult aqparat".
«Qazirgi ýaqytta birinshi órtten tómengi jaqta, Divaev kóshesi boiymen shatqal arqyly ótkende 21-úige qarsy bette, shamamen 1 myń sharshy metr aýmaqta qurǵaq shóptiń órtenýiniń ekinshi jaǵdaiy tirkeldi. Tilsiz jaýmen kúres barysynda belgisiz adamnyń denesi tabyldy. Onyń jynysy men tulǵasy anyqtalýda. Eki órttiń bir-birine bailanysy joq. Sony sóndirýge aýystyq. Jumystar jerden júrgizilýde. Sebebi túngi ýaqytta aviatsiia jumys istei almaidy», - dep jazdy ol Facebook-ta.
Sondai-aq, ol Kóktóbeniń tómengi tusynda tutanǵan ekinshi órtti aýyzdyqtaý nelikten qiyn bolyp otyrǵanyn túsindirdi.
«Almaty qalasy garnizonynyń barlyq jeke quramy órttiń eń joǵary úshinshi dárejesi boiynsha kóterildi. Basymdyq turǵyn úi sektoryn qorǵaýǵa baǵyttalǵan. Jalyn tarap jatyr, onyń aýmaǵy ulǵaiýda. Túngi ýaqyttaǵy jumys qaýipsizdik tehnikasyn saqtaýmen qiyndai túsýde. Sebebi qýraidyń biiktigi keide adamnyń boiyn jaýyp turady. Qazirgi ýaqytta órttiń taralýy toqtatyldy. Jeke oshaqtardy sóndirý júrgizilip jatyr», - dep jazdy ol Facebook-ta.
Eske salaiyq, buǵan deiin qutqarýshylar Kóktóbeniń bókterinde tutanǵan órtpen arpalysqan edi. Tótenshe jaǵdaidy joiýǵa eki tikushaq jumyldyryldy. Sondai-aq TJD-nyń 42 adamy men 9 tehnikasy, «Almaty Tazalyq» MKK-nyń – eki jáne Almaty qalalyq Qutqarý qyzmetiniń bir sýarý tehnikasy jumys istedi.
QR IIM Tótenshe jaǵdailar komitetiniń resmi ókili Nursultan Nurahmetov jalyn saǵat 19.58-de tolyǵymen óshirilgenin málim etken bolatyn. Al Almaty qalalyq Tótenshe jaǵdailar departamentiniń basshysy Serik Áýbákirov órttiń jeke sektorǵa aýysýynyń aldy alynǵanyn, departamenttiń jeke quramy kezekshilik atqarý úshin oqiǵa ornynda qalatynyn aitty.
