Qala ákimi Baqytjan Saǵyntaev onlain kezdesý barysynda qurylys kompaniialarynyń, kásibi qaýymdastyqtar men qarjy uiymdarynyń ókilderimen Almatydaǵy qurylys naryǵynyń damý perspektivalaryn talqylady, dep habarlaidy "Ult aqparat".
Kezdesý barysynda turǵyn úi qurylysynyń sapasy, bilikti kadrlardy daiarlaý, qurylys materialdaryn óndirý, áleýmettik turǵyn úi qurylysynyń qarqyny jáne injenerlik infraqurylymdardy júrgizý máseleleri qaraldy.
Sonymen qatar, keńeske qatysýshylar turǵyn úi qoryn jańartý baǵdarlamasyn iske asyrý tetikterin jetildirý, bos jer ýchaskeleriniń tapshylyǵyn talqylady.
Osyǵan orai, Almaty ákimi Baqytjan Saǵyntaev tarihi ortalyqta, sondai-aq turǵyn úilerdiń aýlalarynda núkteli qurylystardy júrgizýge tyiym salynatynyn atap ótti.
Sonymen qatar, úilerdiń arasyna qurylys júrgizýge de tyiym salynatyn bolady.
Aita keterligi, eski úilerdiń ornyna jańa úilerdi turǵyzǵanda olardyń burynǵy biiktigin saqtaýǵa ruqsat etiledi.
«Men qurylys júrgizýge qatysty erejelerdi ázirleýdi tapsyrdym, onyń negizinde tarihi ortalyqta, aýla aýmaqtarynda bos jatqan jerlerge núkteli qurylys salýǵa, jalpy qurylys júrgizýge tyiym salynady. Basty mindet – qalanyń burynnan qalyptasqan tarihi kelbetin saqtap qalý. Joǵaltyp alǵandarymyzdy qaita jańǵyrtyp, ásem Almatynyń ejelgi dańqy men qaitalanbas kórkin qalpyna keltirý»-, dedi qala ákimi B.Saǵyntaev.
Onyń aitýynsha, erejelerde tarihi ortalyqtaǵy jer ýchaskeleriniń ieleri turǵyndardyń qalaýy boiynsha balalar alańdaryn nemese qoǵamdyq oryndardy salyp, olardyń ainalasyn abattandyra alatyndyǵy kórinis tabady.
Eń bastysy - qalyptasqan arhitektýralyq imidjdi buzbaý. Bulai etpegen jaǵdaida qurylysty júrgizetinderden jer telimderi satyp alynyp, qala menshigine beriledi.
Erejege qatysty tarihi ortalyqtyń, sondai-aq qalanyń basqa aýdandaryndaǵy jeke aýmaqtar – yqshamaýdandardyń, tynysh aýdandardyń shekaralary anyqtalady.
Tarihi mańyzy bar nysandardy anyqtaý qarastyrylýda, olardyń janynan kez-kelgen qurylysty júrgizý qoǵamdyq talqylaýdan ótkennen keiin ǵana múmkin bolady.
Erejelerde qala qurylysyn retke keltirý jónindegi erekshe aýmaqtarda qurylystyń tyǵyzdyǵy men salynatyn ǵimarattardyń biiktigi esepke alynady.
Budan ózge, aeratsiia rejimin jaqsartý, kógaldandyrý, qalalyq qorshaǵan ortany saqtaý jáne jailylyqty keńeitý, qalanyń tarihi kelbetin saqtaý úshin qasbetterdi bezendirý talaptary da jazylatyn bolady.
Qurylys júrgizýge qatysty erejeler qańtar aiynda ázirlenip, aqpan aiynda sarapshylar qaýymdastyǵy men qoǵamnyń keńinen talqylaýyna usynylady.
Qujat naýryz aiynda qabyldanady dep josparlanyp otyr.
Qurylysshylar qaýymdastyǵyna josparlarǵa túzetýler engizý jáne qarqyndy damyp kele jatqan Jańa Almaty aimaǵyna nazar aýdarý usynyldy.
Mysaly, Alataý aýdany, munda turǵyn úi men áleýmettik nysandardyń qurylystary qatar júrip jatyr.
Jalpy, Almaty ákimi B.Saǵyntaev turǵyn úimen qatar áleýmettik nysandar - mektepter, aýrýhanalar, sport nysandary men keshenderdiń qurylystary qarqyn alǵanyn atap ótti. Jumys jalǵasatyn bolady.
Buryn habarlanǵanyndai, 2020 jyly 1 586 myń sharshy metr turǵyn úi nemese kommertsiialyq turǵyn úidiń 16879 páteri salyndy. Memlekettik baǵdarlamalar aiasynda 289,5 myń sharshy metr turǵyn úi nemese 3902 páter iske qosyldy.
Biyl 1716 myń sharshy metr kommertsiialyq turǵyn úi nemese 12 myń páter salý josparda. Memlekettik baǵdarlamalar boiynsha - 328,8 myń sharshy metr turǵyn úi nemese 4470 páter paidalanýǵa beriledi.
