Almatynyń ortalyq kósheleri demalys kúnderi jaiaý júrginshiler jolyna ainalady, dep habarlaidy «Ult aqparat».
Baqytjan Saǵyntaev Twitter-degi paraqshasynda epidemiologiialyq jaǵdai turaqtanǵan soń ýaqytsha jaiaý júrginshi aimaqtaryn qurý jónindegi pilotty jobanyń qolǵa alynatynyn habarlady.
Birinshi kezeńde Almaly aýdanynyń bes kóshesi ár jeksenbi saiyn bir kúnge jabylady. Joba epidemiologiialyq jaǵdai turaqtanǵan soń ǵana bastalady.
«Ýaqytsha jaiaý júrginshiler aimaǵyn qurý úshin demalys kúnderi birqatar kósheni jabýdy sarapshylarmen talqyladyq. Birinshi kezeńde Qabanbai batyr — Gogol — Nazarbaev — Abylai han dańǵylyndaǵy sharshy aimaq usynyldy. Jumysty qaladaǵy epidemiologiialyq jaǵdai turaqtanǵannan keiin bastaimyz»,– dep jazdy Almaty ákimi.
Iaǵni, Qabanbai batyr jáne Gogol kósheleriniń arasyndaǵy Panfilov kóshesi, sonymen qatar Nazarbaev jáne Abylai han dańǵyldary arasyndaǵy Bógenbai batyr, Tóle bi, Qazybek bi, Áiteke bi kósheleri ýaqytsha jaiaý júrginshiler aimaqtaryna ainalatyn bolady. Qoǵamdyq kólikter men arnaiy mashinalardyń júrýine ruqsat beriledi.
Basty maqsat – kólik júktemesin azaitý. Al qalanyń basqa aýdandarynda jeksenbi kúni bir ǵana kóshe jabylady.
Sarapshylar qoǵamdastyǵy megapolistiń ekologiialyq ahýalyn jaqsartýdyń birqatar sharalaryn qarastyrýda. Atap aitsaq, júk kóligi men mototsiklderdiń qozǵalysyna zertteý júrgiziledi.
Bul mańyzdy iske kólik, ekologiia, ýrbanistika, qala qurylysy salalarynyń mamandary tartylady. Olar ekologiialyq ahýaldy jaqsartý boiynsha keshendi sharalardy usyný úshin qalanyń kólik júktemesin, zalaldy jáne dybystyq zattardyń taralý deńgeiin jan-jaqty zerttep, ózderiniń baǵalaryn beretin bolady.
