«Almatynyń erekshe mártebesi týraly zańy» aiasynda jasyl jelekti kútip baǵý erejelerin bekitý Almaty ákimdiginiń quzyryna berildi, dep habarlaidy QazAqparat.
Almaty ákiminiń orynbasary Muhit Ázirbaevtyń aitýynsha, bul ózgeris qaladaǵy jasyl jelek qoryn saqtaýǵa múmkindik bermek.
«Bul erejelerge ótemaqy retinde otyrǵyzylatyn jasyl jelektiń sapasy men kólemi, ony jańartý, sanitarlyq kesý, baǵyp kútý boiynsha birqatar normalar kirgiziledi», - dedi Muhit Ázirbaev.
Jeke jáne memlekettik kásiporyndar jasyl jelek otyrǵyzatyn kezde quzyrly organ mamandarynyń usynysyn eskeretin bolady.
«Osy erejeler aǵashtardy qaida otyrǵyzý kerektigine bailanysty. Qalanyń qai óńirine qylqanjapyraqty, qai óńirine basqa aǵashtardy otyrǵyzý kerektigine osy erejelerde bekitip jazǵymyz keledi. Qalany baqqa ainaldyrý úshin tártip kerek. Jekelegen kásiporyndar men kompaniialar da oiyna kelgen aǵashty otyrǵyzbai belgili bir táptippen otyrǵyzý kerek», - dedi ákimniń orynbasary.
Odan bólek jasyl ekonomika salasynda jańa tehnologiialardy yntalandyrý úshin sharalar qoldanylmaq. Jańa tehnologiialar usynǵan kompaniialarǵa sý resýrstaryn paidalanǵany úshin, qoqysty shyǵarǵany úshin, atmosferany saqtaý úshin tólenetin salyqqa jeńildik qarastyrylady.
Aita ketý kerek, búgin brifing barysynda Almaty qalasynyń erekshe mártebesi týraly zańnan qandai ózgerister kútiletini jaily aityldy.
