Foto: Aleksandr Pavskii/ Kazinform
Kólik ministri Marat Qarabaev Úkimet otyrysynan keiin ótken baspasóz máslihatynda Almatynyń ainalma jolymen júrý aqysy nege qymbattaǵanyn túsindirdi, dep habarlaidy Ult.kz Kazinform-ǵa silteme jasap.
- Birinshiden, ol joldy salǵanda oǵan Almaty qalasy men Almaty oblysynan kelip qosylatyn 6 joldy qosqanda táýligine 45 myń kólik ótedi dep josparlaǵanbyz.
Al qazir sol radialdy joldar qosylmaǵannyń ózinde táýligine 75 myń kólik ótip jatyr. Árine, bul jolǵa beriletin júktemeni kóbeitedi. Iaǵni, joldy kútip ustaýǵa qosymsha qarajat kerek bolady jáne joldyń eskirýin tezdetedi. Sondyqtan, joldy kútip ustaý úshin jáne der kezinde jóndep otyrý úshin aqysyn kóterdik, - dedi ministr.
Marat Qarabaev bul jolmen sheteldik kólikter óte jii qatynaitynyn eske saldy.
- Ekinshiden, ol - memleket-jeke menshik áriptestigi aiasynda salynǵan jol. Iaǵni, memleket óz esebinen tólep jatyr. Budan buryn da aitqanbyz, bizdiń basty maqsat – jol salasynda memleketke túsetin júktemeni azaitý. Al sodan únemdelgen qarajatty basqa áleýmettik baǵyttarǵa jiberý kózdelgen. Almatynyń ainalma joly 66 shaqyrym desek, munda sheteldik kólikter óte kóp júredi. Osy eki sebeppen jol aqysyn kóterdik, - dedi ol.
Atalǵan baspasóz máslihatynda Marat Qarabaev qosylǵan qun salyǵyn kóterý bastamasy men janarmai baǵasynyń naryqqa berilýi taksi baǵasyna qalai áser etetini týraly pikir bildirdi.
