Almaty ákimdiginde ótken máslihat otyrysynda 2020-2022 jyldarǵa arnalǵan qala biýdjeti talqylandy, – dep habarlaidy «Ult aqparat».
«Almaty biýdjeti 738 mlrd teńge kóleminde bekitildi. Aldaǵy eki jylda qala biýdjeti áleýmettik salalarǵa baǵdarlanǵan bolyp qala beredi. Áleýmettik salaǵa shamamen, 280 mlrd teńge, iaǵni 40% jumsalady. Atap aitqanda, bilim berý salasyna - 172 mlrd teńge, densaýlyq saqtaý salasyna - 77 mlrd teńge, halyqty áleýmettik qorǵaýǵa – 26 mlrd teńge, qalanyń injenerlik infraqurylymyn damytýǵa - 39,9 mlrd teńge, qoǵamdyq kólikti damytý salasyna – 121,5 mlrd teńge, tótenshe jaǵdailardyń aldyn alý men qaýipsizdik salasyna – 17,9 mlrd teńge, tsifrlandyrýǵa – 1,7 mlrd teńge, kásipkerlik pen biznesti damytýǵa - 13,2 mlrd teńge, qalanyń 8 aýdanynyń damýyna 1,4 mlrd teńge jumsalady», - dedi qalalyq Strategiia jáne biýdjet basqarmasynyń basshysy Nurtas Qaiyrov.
Máslihat depýtattary biýdjet jobasyn biraýyzdan qoldady.
«Biýdjet jobasyn qaraý kezinde qalalyq máslihat depýtattarynyń jáne profildi komissiialardyń talqylaýy boldy. Bul jiyndarda kóbinese áleýmettik máseleler kóterildi. Qarjyny ońtailandyrý nátijesinde barlyq daýly másele sheshimin tapty. Ásirese jol infraqurylymy, turǵyn úi-kommýnaldyq sharýashylyǵy, qoǵamdyq kólik, qaýipsizdik, bilim berý, densaýlyq saqtaý salalaryna bólindi. «Jańa Almaty» keshendi josparyn júzege asyrý mindetterin eskerdik. «Shekarasyz qala» baǵdarlamasy aiasynda turǵyndardy aýyzsýmen, kógildir otynmen, kósheni jaryqtandyrý, áleýmettik nysandar qurylysy, aýlalardy abattandyrý máselelerine basymdyq berilgen. Jalpy alǵanda qala biýdjeti jobasy biyl da áleýmettik salalarǵa mańyz berip otyr», - dedi máslihattyń Ekonomika jáne biýdjet boiynsha komissiiasynyń tóraǵasy Sergei Kozlov.
