Almatyda jyl basynan beri memlekettik baǵdarlama aiasynda óz kásibin ashý úshin 700-den astam adam 555 myń teńge kóleminde grant aldy. Bul týraly Almaty qalasy áleýmettik ál-aýqat basqarma basshysynyń orynbasary Daniiar Álkebaiuly onlain brifing barysynda málim etti, dep habarlaidy "Ult aqparat".
Onyń aitýynsha, «Bastaý Biznes» kýrsynan ótken 706 adam qarjylai grantqa ie bolǵan, ol adamdar qazir óz kásipterin ashyp, jumys isteýde.
«Eńbek» memlekettik baǵdarlamasynyń ekinshi baǵyty aiasynda jańa biznes ideialardy júzege asyrýǵa, jeke biznes ashýǵa nemese qoldanysta kásipti keńeitýge 555myń teńgege deiin granttar qarastyrylǵan. Búgingi kúni 706 adam 392,3 mln teńgege grant aldy. Osy jobaǵa qatysam deýshiler jumyspen qamtý ortalyǵyna júgine alady», – dedi Daniiar Álkebaiuly.
Sonymen qatar, ol «Jumyspen qamtýdyń jol kartasy baǵdarlamasy» boiynsha 103,9 mlrd teńgege 216 infraqurylymdyq joba júzege asyrylatynyn aitty.
«Infraqurylymdyq jobalardy iske asyrý aiasynda jumyssyz jastarǵa basymdyq beriledi. Barlyǵy 26 myń jańa jumys ornyn qurý josparda. Búgingi tańda atalǵan joba aiasynda 14,3 myń jumys orny quryldy, onyń ishinde 12 myń adam jumyspen qamtý ortalyǵy arqyly ornalasty», – dedi ol.
