Almatylyqtardy 15 million teńgege aldap ketken alaiaq qamaýǵa alyndy, dep habarlaidy QazAqparat.
Alataý aýdanynyń politsiia qyzmetkerleri 30 jastaǵy azamat E.-ge qatysty QR QK-niń 190-baby 3-bóligi boiynsha qylmystyq is qozǵady.
«Er adam Almatynyń birneshe turǵynyn aldady degen kúdikke ilindi. Onyń áreketinen keltirilgen jalpy materialdyq shyǵyn shamamen 15 million teńge. Kúdikti ózin dóńgelekter men diskterdi tek kóterme jetkizýshi retinde tanystyrǵan. Alam deýshilerge tikelei qoimadan arzan baǵadaǵy taýardy alyp berýge ýáde berip, taýar tólemin aldyn alyp otyrǵan. Ol taýardyń kólemine qarai 500 myńnan 6 million teńgege deiin alǵan. Búgingi kúni onyń ústinen 12 azamattan politsiiaǵa aryz tústi», – dedi Alataý aýdandyq politsiia basqarmasynyń bastyǵy Iliias Ómirserikov.
Kúdikti ýaqytsha ustaý izoliatoryna qamaldy.
Politsiia ókili, E. esimdi azamattyń qylmystyq áreketterinen zardap shekken adamdardan myna telefondar arqyly habarlasýlaryn suraidy: 8-700-300-99-96; 8-778-626-11-08.
