Almatylyqtar áleýmettik jeli arqyly úilerinde jylýdyń joq ekenine shaǵymdandy, dep habarlaidy QazAqparat.
«Nazarbaev 189/2-de áli jylý joq. 10 kún boldy, áli tońyp júrmiz. Balalar men biz, eresekter de tondyq. Bul máseleni PIK-ke silteidi. PIK bolsa, jóndeýge silteidi. Osynyń bárine jazda daiyndalsa bolmas pa edi?! Ákimdik, sizder jaqyn jerdesizder ǵoi. Kelip, kóz jetkizińizder! Kórshi podezde 90 jastaǵy apa tońýda. Jeksenbide jylý beremiz dep ýáde bergen, biraq, áli jylý joq», - dep shaǵymdandy Almaty turǵyny.
Atalǵan másele boiynsha «Almaty jylý júiesi» JShS-da osy mekenjai boiynsha balanstyq shekteý shekarasyndaǵy parametrler berilgen dep jaýap berdi.
«Qazirgi ýaqytta úidiń ózinde jylytý júiesi óship tur. PIK tehnikalyq jertólede memlekettik baǵdarlama boiynsha jylý júiesin ishinara aýystyrýda», - dep málimdedi «Almaty Jylý júiesi» energetikalyq kompaniiasynan.
Qalanyń Baitursynov, 191 úide turatyn taǵy bir turǵyny úide jylý jáne ystyq sýmen qamtý boiynsha másele bar ekenin aitty.
«Kesheden beri ystyq sýdyń ornyna sýyq sý aǵýda. Batareialar sál ǵana jyly», - dep Facebook-taǵy topqa jazdy.
Jeliniń basqa paidalanýshysy — Gagarin, 280a turǵyny úiiniń áli jylý júiesine qosylmaǵanyn jazdy.
«Úide óte sýyq. Páterden góri, dala jyly. Biz ákimdikke de qońyraý shalǵan edik, olar bizge Bostandyq aýdanynyń jylytý boiynsha bas mamany Erlan Seidýllaevtyń telefon nomerin berdi. Men oǵan keshe habarlasqanda, jylý keshke beriledi degen, biraq, áli eshqandai ózgeris joq. Batareialar qalai sýyq boldy, áli solai. Bul másele bizde jyl saiyn qaitalanady. Bizdi tek 20 qazannan keiin jylýǵa qosady, onyń ózinde de tolyq qospaidy», - dep shaǵymdandy almatylyq turǵyn.
Atalǵan shaǵymdar boiynsha «Almaty Jylý júiesi» mamandary jumys júrgizilip jatqanyn habarlady.
Sondai-aq, jaqynda Pediatriia men balalar hirýrgiiasynyń ǵylymi ortalyǵynda jylýdyń joqtyǵy týraly shaǵym jazylǵan edi: «Aýyr naýqas balalar sýyq palatalarda tońýda. Balalardyń densaýlyǵyna kim jaýap beredi? Nege kishkentai naýqas balalar jylýsyz qaldy?», - dep suraq qoidy Facebook paidalanýshysy.
«Almaty Jylý júiesi» sol kezde ǵylymi ortalyqqa jylý 2 qazanda berildi dep jaýap bergen bolatyn.
«Jylý tasymaldaǵashtyń ýaqytsha bolmaýy jaqyn mańdaǵy obektilerdi belsendi qosýmen bailanysty boldy. Bul jelilerdegi qysymnyń tómendeýine áser etti. «Almaty jylý júiesi» JShS qyzmetkerleri ǵylymi ortalyqtaǵy jelilerdiń jumysyn qalpyna keltirý boiynsha jumystar júrgizdi.
Aǵymdaǵy jylytý maýsymy aýa raiy jaǵdaiyn esepteýmen bekitilgen temperatýralyq kestege sáikes júrgiziledi. Ádette, ortalyqtandyrylǵan jylýmen jabdyqtaýdy tolyq qalypqa keltirý úshin jylytý maýsymy ashylǵan soń, shamamen bir apta qajet.
Bul jylý energiiasy júieleriniń tehnologiialyq erekshelikterine bailanysty», - dep jaýap berdi kompaniiadan.
