Almaty turǵyndary QR tólemdi qoldanýda kósh bastap tur. Bul týraly «Azamattarǵa arnalǵan úkimet» memlekettik korporatsiiasynda málim etti, dep habarlaidy QazAqparat.
Vedomstvonyń dereginshe, 2021 jyly «Azamattarǵa arnalǵan úkimet» memlekettik korporatsiiasy Kaspi jáne Halyq Bank-pen birlesip, HQO-larda memlekettik bajdy QR kómegimen tóleý servisin engizdi. Bir jyl ishinde qazaqstandyqtar QR kodty 700 myńnan astam ret suratyp, 2,8 mlrd teńgeden astam somaǵa tólem jasaǵan.
«Servis engizilgen sátten bastap bólimderdegi kassalar júktemesi tómendedi. Klientter ýaqytyn únemdep, operatordyń aldynda otyryp-aq qyzmet aqysyn tóleidi ári QR kod arqyly tólem jasalǵanda komissiia alynbaidy», - dedi «Azamattarǵa arnalǵan úkimet» memlekettik korporatsiiasy Almaty qalasy filialy direktorynyń orynbasary Ásem Bolatbekova.
QR tólemdi belsendi qoldanǵandardyń ishinde Almaty qalasynyń (72 052) turǵyndary kósh bastap tur, ekinshi orynda qaraǵandylyqtar (63 278), odan keiin tizimde astanalyq turǵyndar (54 354).
QR kodtyń kómegimen memlekettik qyzmetterdiń baj alymyn eń az tólegender Atyraý (23 080) men Soltústik Qazaqstan oblysynyń turǵyndary (23 449).
Eske salsaq, Memleket basshysy 2021 jylǵy Joldaýynda memlekettik qyzmetterdi alý kezindegi problemalarǵa nazar aýdaryp, bul protsesterdi tolyǵymen tsifrlandyrýdy tapsyrǵan bolatyn.
Sondai-aq, «Azamattarǵa arnalǵan úkimet» memlekettik korporatsiiasy keltirgen derekke sáikes, QR kod arqyly tólem jasaý siiaqty servister azamattardyń memlekettik qyzmetterdi alý retin jeńildetýge kómektesedi.
Qazir QR kodtyń kómegimen 146 túrli memlekettik qyzmettiń aqysyn tóleýge bolady. Bolashaqta bul tizim tolyqtyrylatyn bolady.
Aita keteiik, QR kod arqyly memlekettik baj alymyn tóleý Kaspi jáne Halyq Homebank mobildi qosymshalary arqyly qoljetimdi.
