Almaty ákimi Baqytjan Saǵyntaev Almaly aýdanynyń turǵyndarymen kezdesti, dep habarlaidy "Ult aqparat".
Kezdesýge kelgen turǵyndar Almaly aýdanynyń PIK-terdiń jáne monopolisterdiń jumystaryna shaǵymdandy, sonymen qatar, ekologiiany jaqsartý, qalada ómir súrý úshin jaily jaǵdailar jasaý jóninde paidaly usynystar aitty.
Almaly aýdany mádeni jáne qoǵamdyq ómirdiń tarihi ortalyǵy bolyp sanalady. Aýdanda sý, jylý, káriz jáne elektr máselesi tolyq sheshilgen.
Ýrbanistika jáne jaily orta máseleleri áli de ózekti bolyp otyr.
Aýdanda taǵy 18 km trotýar salý jáne halyqtyń múmkindigi shekteýli toby úshin 28 km joldy qaita qalpyna keltirý qajet. 26 ýchaske mańyna syrtqy jaryq ornatylady, sonymen qatar 49 aýla aimaǵy men 68 kóshege qosymsha jaryq beriledi.
2020 jyly Almaly aýdanyndaǵy 192 aýla jóndeledi, qalǵan 52 aýla 2021 jyly jańartylady.
Jeke investorlardyń kómegimen eski úilerdiń problemasy sheshilýde, aǵymdaǵy jyly aýdanda 7 eski úi súrilgen, 52 otbasy baspanasyn jaqsartqan. Jalpy, osy máseleni utymdy sheshý úshin qalalyqtardyń belsendilik tanytýlary jáne investor usynǵan nusqa boiynsha biraýyzdan sheshim qabyldaǵandary jón.
Oqýshy ornynyń tapshylyǵyn joiý úshin Raiymbek dańǵyly men Tilendiev kóshesi boiynda 1000 oryndy mektep salý josparlanǵan. Aita keterligi, keler jyly №144 mektep-gimnaziia janynan qosalqy nysan salý úshin qujattar ázirlenip jatyr.
Búgingi kezdesýde PIK-terdiń jumysyna jáne «Almatytelekom» kompaniiasynyń bailanys qyzmetine kóp shaǵym aityldy. Degenmen, turǵyndar ekologiia men jasyldandyrýdy jaqsartý, onyń ishinde shyrsha baǵyn bólý boiynsha usynystaryn aitty. Sonymen qatar, turǵyndar kóshelerdegi ýrnalardyń azdyǵyna, parkter men kóńil kóteretin oryndarda qaýipsizdikti qamtamasyz etýge nazar aýdardy.
Aýdan turǵyndaryn qoǵamdyq kóliktiń jumysy da tolǵandyrady. Almaty ákimi B. Saǵyntaev avtobýstar tapshylyǵy qala jáne jeke avtoparkter esebinen tolyǵatynyn atap ótti. Trolleibýstardyń taǵdyry týraly qoiylǵan saýalǵa qala ákimi B. Saǵyntaev jaýap berdi.
«Trolleibýstardyń jumysy toqtamaidy. Bul qoǵamdyq kólik halyqqa qyzmet kórsete bermek. Tipti, keler jyly onyń bailanys jelileri men infraqurylymyn jańartamyz», — dedi Baqytjan Saǵyntaev.
Kezdesý sońynda, Baqytjan Saǵyntaev qalalyqtardy belsendi bolýǵa jáne qalany jaqsartý jumystaryna atsalysýǵa shaqyrdy.
