Almaty turǵyndary Esentai ózeni arnasynyń qazirgi jai-kúiine alańdaýshylyq bildirdi. Sebebi, qazir arnada sý joq jáne túbi topyraq, tunba, basqa da shógindilerden tazartylmaǵan, dep habarlaidy QazAqparat.
Facebook jelisinde tazalanbaǵan ózen túbiniń sýretteri paida boldy.
«Sátpaevtan tómen Vesnovka (Esentai) osylai kóńilsiz kórinedi», - dep jazdy avtor foto astynda.
Jeli qoldanýshylary da ózderiniń narazylyǵyn qaldyrdy.
«Vesnovka sumdyq... Million turǵyny bar qalanyń ortalyǵy osyndai... Ál-Farabiden joǵary jáne tómen dál osylai kórinedi... Jaz boiy sý bolǵan joq... Jazda eshteńe jasalmady... Sý da joq, aǵashty sýarý da joq... Ál-Farabiden joǵary qurǵaq kóshetter alynyp, ornyna jańa kóshetter otyrǵyzyldy, biraq sýarylmaidy... Qurmanǵazy kóshesiniń tómen jaǵyndaǵy batpaqtanǵan Vesnovkadan jaman iis shyǵady», - dep jazdy turǵyndar.
Bul másele boiynsha Almaty qalasynyń Jasyl ekonomika basqarmasynda jaýap berdi.
Basqarmanyń málimetinshe, atalǵan ýchaskedegi Esentai ózeniniń arnasyn rekonstrýktsiiaǵa jobalyq-smetalyq qujattama ázirleý úshin qarajat bólýge biýdjettik ótinim beriledi.
«Qarajat bólingen kezde jobany ázirleý jumystary bastalady. Qazir sý bólgishten Jamaqaev kóshesine deiin Esentai ózeni arnasynyń sý qorǵaý beldeýi ýchaskesin rekonstrýktsiia jumysy júrgizilip jatyr. Osyǵan bailanysty Esentai ózeni sýynyń bir bóligi Kishi Almaty ózenine jiberiledi. Joǵaryda aitylǵandarǵa bailanysty sý deńgeii ýaqytsha tómendedi. Jumystar qarasha aiynyń sońynda aiaqtalady», - dep túsindirdi basqarma.
Úlken Almaty jáne Esentai ózenderiniń arnalaryn tazartý jónindegi baǵdarlamanyń ákimshisi - «Qazseldenqorǵaý» MM.
