Almaty ákimi Baqytjan Saǵyntaev «Almaty» telearnasyndaǵy Akimat live baǵdarlamasynyń tikelei efirinde koronavirýstyń aǵymdaǵy jaǵdaiy jáne vaktsinalaný qarqyny týraly aitty, dep habarlaidy QazAqparat.
Almaty epidemiologiialyq baǵalaý matritsasy boiynsha áli qyzyl aimaqta.
«22 qyrkúiekte qalada koronavirýs infektsiiasynyń 164 289 jaǵdaiy tirkeldi, onyń ishinde 141 872 naýqas simptomdy jáne 22 417 – simptomsyz, anyqtalmaǵan pnevmoniia – 2346. 21 qyrkúiete koronavirýs infektsiiasynyń 498 jaǵdaiy tirkeldi, onyń ishinde 470-i simptomdy, 28-i simptomsyz, anyqtalmaǵan pnevmoniia – 5»,- dedi qala ákimi.
Baqytjan Saǵyntaev qalada koronavirýsqa shaldyqqan naýqastarǵa arnalǵan tósek oryndar men naýqastardyń búgingi naqty sanyn aitty: «Infektsiialyq statsionarlarda 5230 tósek oryn bar, olarda 2337 adam emdelýde, onyń ishinde 111 bala. 100 naýqas aýrýhanaǵa óte aýyr jaǵdaida tústi, 993-iniń jaǵdaiy aýyr, 1241-i ortasha aýyrlyqta, 3-iniń jaǵdaiy jeńil. Reanimatsiia jáne intensivti terapiia bóliminde 229 naýqas jatyr. ÓJJ apparatynda – 43, invazivti emes ÓJJ – 103, High flow apparatyndaǵylar – 68».
Shahar basshysy áli de sanitarlyq-epidemiologiialyq qaýipsizdik sharalaryn saqtaý kerektigin jáne indetke qarsy jappai vaktsinalaný - infektsiianyń jańa tolqynynyń aldyn alýǵa kómektesetinin aitty.
«Ekpe saldyrý elimizdiń keibir aimaqtarynda tirkelgen jańa Eta shtammyna da tosqaýyl bolady»,- dedi B.Saǵyntaev.
Ótken táýlikterde birinshi komponentpen 2417 adam, ekinshi komponentpen 3906 adam vaktsinatsiialandy. 1 aqpannan 21 qyrkúiekke deiingi aralyqta 933 678 adam I komponentpen, 827 239 II komponentpen egildi.
