Almatylyqtar Qaraǵaily saiabaǵyna kelip, 1931-1933 jylǵy asharshylyq qurbandaryna arnalǵan eskertkish mańyna gúl shoqtaryn qoidy, dep habarlaidy QazAqparat tilshisi.
Osydan eki jyl buryn Elbasynyń tapsyrmasymen Almatynyń ortasynda ashqursaq balasyn qushaqtaǵan ashtyqtan álsiregen ananyń beinesinde asharshylyq qurbandaryna eskertkish ornatylǵan edi. Búgin qala turǵyndary osy eskertkishke gúl shoqtaryn qoiý úshin Qaraǵaily saiabaǵyna jinaldy.
Almaty ákimi Baýyrjan Baibek el tarihyna kóz júgirtsek, ult basyna kún týǵan aýyr da almaǵaiyp kezeńderdiń az bolmaǵanyn, biraq qazaq halqy bolashaqqa degen úmiti men senimin eshqashan joǵaltpaǵanyn atap ótti.
«Elbasy aitqandai, tarihqa jiti kózben qarap, ótkendi umytpaýymyz - osyndai náýbet qaitalanbas úshin qajet. Halyqtyń qasiretti kezeńderi ərdaiym eldiń jadynda bolýy tiis. Bul rette tutas ultty joiyp jibere jazdaǵan asharshylyq eshqashan umytylmaq emes. Búgingi Qazaqstan - halyqtyń birligi men kelisimin jáne beibit ómirdi baǵa jetpes qundylyqqa baǵalaǵan el. Halyq aitpaqshy, «jumyla kótergen júk jeńil». Mundai náýbet eshqashan qaitalanbasyn. Qashanda elimizdiń irgesi berik, bolashaǵy jarqyn bolsyn», - dep atap ótti Baýyrjan Baibek.
Qazaqstanda 1918-1933 jyldar aralyǵynda túrli málimetter boiynsha úsh millionnan astam adam qyrylyp qalǵan, onyń ishinde 1931-1933 jyldary 1,7 million adam kóz jumǵan. 100 myńnan astam qazaqstandyq 1937-1938 jyldarǵy repressiia qurbany bolǵan. 1997 jyly Qazaqstan Respýblikasy Tuńǵysh Prezidentiniń Jarlyǵymen 31 mamyr Saiasi quǵyn-súrgin qurbandaryn eske alý kúni bolyp jariialandy.
