Almaty qalasynyń ákimshilik quqyq buzýshylyqtar jónindegi mamandandyrylǵan aýdanaralyq sotynda K. esimdi azamatqa qatysty usaq buzaqylyq boiynsha is qaraldy, dep habarlaidy QazAqparat.
Sot barysynda anyqtalǵany, almatylyq turǵyn áleýmettik jelide pranker retinde óziniń kórermenderin kóbeitý maqsatynda «Magným» saýda dúkeninde video túsirgen. Onda pranker beline deiin kiimin sheship tastap, jalpyǵa ortaq etikany saqtamai «Býratino» ish!» dep aiqailaǵan. Osy áreketimen ol ainalasyndaǵylardy syilamaityndyǵyn bildirip, qoǵamdyq tártip pen jeke tulǵalardyń tynyshtyǵyn buzǵan.
«Sot májilisinde K. esimdi azamat óziniń ákimshilik quqyq buzýshylyq jasaǵanyn tolyq moiyndap, is áreketine ókinetinin jetkizdi. Sot qaýlysymen kináli azamatty 15 táýlik merzimge qamaýǵa alý túrindegi ákimshilik sharasy taǵaiyndaldy. Qaýly zańdy kúshine engen joq», - delingen sottyń habarlamasynda.
