Almatylyq politseiler kópirden sekirmek bolǵan qyzdy qutqardy, dep habarlaidy "Ult aqparat".
Oqiǵanyń videosyn Almaty qalalyq Politsiia departamentiniń Bostandyq aýdandyq politsiia basqarmasynyń bastyǵy Dáýren Ótebaev Facebook-taǵy paraqshasynda jariialady.
«Búgin politsiia qyzmetkerleri Sátbaev-Baizaqov kóshesiniń boiyndaǵy kópirden sekirmek bolǵan qyzdy qutqardy. Óz-ózine qol jumsamaq bolǵan boijetken týraly 102 nómirine jáne qalalyq Tótenshe jaǵdailar departamentine Almaty Taýers ǵimaratynyń kúzet basshysy habarlap aitty», – delingen videoda.
Almaty Politsiia departamentiniń baspasóz qyzmeti naqtylaǵandai, oqiǵa búgin tańerteń boldy.
«Patrýldik politsiia qyzmetkerleri qyzdyń ómirin saqtap qaldy. Olar sol mańnan ótip bara jatqan. Boijetken kópirdiń syrtqy qorshaýyna shyǵyp alǵan. Politseiler ony raiynan qatarýǵa tyrysyp, áńgimege tartty, sol kezde politseilerdiń biri qyzdy ustap alyp, sekirýge múmkindik bermedi», - dep habarlady qalalyq politsiiadan.
