Almatylyq ýchaskelik politsiia inspektory kóptiń arasynan áriptesin alyp shyǵýǵa qalai kómekteskenin aityp berdi, dep habarlaidy QazAqparat.
Bul – Medeý aýdandyq politsiia basqarmasy ÝPP-79 bóliminiń aǵa ýchaskelik inspektory Ernar Áitenov.
Ol 5 qańtar kúni kúndiz bolǵan tártipsizdik týraly egjei-tegjeili aityp berdi
Olar tańerteń Medeý aýdandyq politsiia basqarmasy basshylyǵynyń nusqaýymen qoǵamdyq tártip pen qaýipsizdikti qamtamasyz etý maqsatynda Tóle bi men Baitursynov kósheleriniń qiylysyna jóneltilgen.
«Sherýshilermen qiian-keski qaqtyǵys kezinde kúshter Seifýllin kóshesine yǵystyryldy. Bógenbai batyr men Seifýllin kósheleriniń qiylysynda politsiia qyzmetkerin ustap alǵan agressivti er adamdardy baiqadym. Onyń úsheýi tutqynǵa alynǵan politsiia qyzmetkerin qiylystyń ortasyna aparyp, tizerletip otyrǵyzyp qoiyp, qorqytý maqsatynda qatty ura bastady. Bul áreketterdi kórgende shoshyp kettim, tipti, azdap eseńgirep qaldym. Alaida, oiymdy tez jinaqtap, áriptesime kómektesýge umtyldym. Men olardy taratý úshin tike jinalǵandardyń arasyna qarai júgirdim. Artymnan júgirip kele jatqan joldastarym, ustalǵan qyzmetkerdi qalqanmen jaýyp, alyp shyqty», – deidi Áitenov.
Onyń aitýynsha, qutqarylǵan áriptesimen buryn tanys bolmaǵan. Qolǵa túsken politsei aýyr jaraqat alǵan jáne qazir emdelip jatyr.
«Men buryn-sońdy mundai qatygezdikti kórgen emespin, adamdardyń mundai áreketi meniń kóńilimdi qaldyrdy, biraq áskeri mindet pen ant bárinen joǵary. Barlyǵy men siiaqty áreket etetinine senimdimin», – dep túiindedi quqyq qorǵaý organynyń qyzmetkeri.
Ernar Áitenov – IIM Almaty akademiiasynyń túlegi. Qazir ol 15 myń turǵyny bar «Samal» yqshamaýdanynda tártipti kúzetedi.
Inspektor bul qiyn-qystaý kúnderi ata-anasynyń ol úshin qatty alańdaǵanyn aitty. Sondai-aq, Ernar – otbasyndaǵy jalǵyz bala.
