Foto: Almaty ákimdigi
Almaty ákimi Erbolat Dosaev Parijde ótken Olimpiada oiyndaryna qatysqan almatylyq sportshylarmen kezdesti, dep habarlaidy "Ult aqparat" Almaty ákimdigine silteme jasap.
Shahar basshysy sportshylar men jattyqtyrýshylardy Olimpiadanyń kúmis júldegeri – gimnast Nariman Qurbanovty, qola júlde alǵan – dziýdoshy Ǵusman Qyrǵyzbaevty, boksshy Nazym Qyzaibaidy jáne oq atýdan saiysqa túsken mergender Aleksandra Le men Islam Sátbaevty jetistikterimen quttyqtady.
"Ulttyq qurama sapynda óner kórsetken almatylyq sportshylardyń Qazaqstan qorjynyna kóp medal salǵany qýantady. Talanttaryńyzdyń, tabandylyǵyńyzdyń jáne eńbekqorlyǵyńyzdyń arqasynda sizder mańyzdy da tarihi jeńiske qol jetkizip, halyqtyń ystyq yqylasyna ie boldyńyzdar, álemdik sporttyń damýyna úles qostyńyzdar. Sizder súiikti is pen týyp-ósken elge, jerge degen súiispenshiliktiń jarqyn úlgisisizder", - dedi Almaty ákimi Erbolat Dosaev.
Foto: Almaty ákimdigi
Nariman Qurbanovqa eki bólmeli páterdiń, al Ǵusman Qyrǵyzbaevqa, Nazym Qyzaibaiǵa, Aleksandra Le men Islam Sátbaevqa bir bólmeli páterdiń sertifikaty tabystaldy.
Sonymen qatar sportshylarǵa 5 jáne 4 million teńgeden aqshalai sertifikattar jáne jańa avtokólikterdiń kilti berildi. Ákimdik bergen turǵyn úi sertifikatymen birge Nariman Qurbanovqa demeýshiler esebinen taǵy bir páter syiǵa tartyldy.
Olimpiadada eldiń namysyn qorǵaǵan barlyq almatylyq sportshy men bapkerler quramy aqshalai sertifikattarmen marapattaldy.
