Foto: ©️ Tengrinews.kz / Alihan Sariev
Almatydaǵy hostel turǵyny qaiǵyly oqiǵanyń kýágeri bolǵan. Ol oqiǵa týraly aityp berdi, - dep habarlaidy Tengrinews.kz saity.
Vladimir ákimshi bolyp jumys istegen áielimen hostelde turǵan.
"Tútin jaiylǵanda oiandyq. Bizdiń bólme joǵarǵy qabatta, birinshi qabatta, esikke jaqyn edi. Men - jergilikti turǵynmyn, áielimmen hostelde turǵanmyn. Ol ákimshi bolyp jumys istedi, kezekshilikte bolatyn. Áielimdi ǵimarattan alyp shyqtym. Betimdi dymqyl shúberekpen jaýyp, basqa qonaqtardy birinshi qabattan shyǵarýǵa kómektestim. Men tek tútindi kórdim, biraq tómengi qabattan júgirip shyqqandar otty kórgen. Qaza bolǵandar - negizinen tómende turǵandar. Men órtsóndirýshilerden gazǵa qarsy qurylǵy suradym, biraq maǵan bermedi. Múmkin men tómengi qabattaǵy adamdardy tezirek taýyp, bireýdi qutqarar ma edim, óitkeni men ondaǵy bólmelerdi jaqsy bilemin", - dedi Vladimir.
Kýágerdiń aitýynsha, jataqhanada 50-den asa adam turǵan, olardyń kópshiligi - Almatyǵa jumys isteýge kelgen Qazaqstan azamattary. Onda stýdentter men shetel azamattary da turǵan.
"Meniń oiymsha, bir stýdent sol jerde qaitys boldy, qalǵandary - jumysshylar. Dabyl qaǵyldy, biraq odan ne paida, tek dybysy shyǵady. Meniń oiymsha, órttiń shyǵýyna elektr symdary sebep boldy, ol kerneýdi kótere almady", - dep qosty er adam.
Almaty ákimdigi málimetinshe, hostelde turatyndar arasynda Pákistan men basqa da elderdiń azamattary bar.
"Qaza bolǵandardyń jeke basyna qatysty málimetter anyqtalǵannan keiin beriledi", - dep habarlady Almaty ákimdigi.
Eske sala keteiik, 30 qarashada tańerteń Almatyda Ádi Sháripov kóshesindegi hostelde órt shyǵyp, aldyn ala málimet boiynsha 13 adam qaza tapty.
Foto: Tengrinews.kz
