Almaty balalar jedel járdem aýrýhanasynyń dárigerleri Shyǵys ainalma jolynan tabylǵan búldirshinniń jaǵdaiy týraly aitty. Aq halattylar balanyń ómirine qaýip tónip turǵan joq deidi.
"Qazir balanyń beti beri qarap keledi. Esin jidy, barlyǵyn túsinedi. Aiaq-qoldaryn qimyldatyp jatyr. Oń qoly men aiaǵyn qozǵaltýǵa, jymiiýǵa tyrysady. Emotsionaldy jáne klinikalyq jaǵynan ózin burynǵydan áldeqaida jaqsyraq sezine bastady", — dedi Almaty balalar shuǵyl kómek aýrýhanasynyń dáriger-neirohirýrgy Nikolai Diachenko.
Sondai-aq, ol kepildendirilgen tegin meditsinalyq kómek kólemi aiasynda intensivti terapiia jalǵasyp jatqanyn atap ótti.
Qazir balanyń ómirine eshqandai qaýip tónip turǵan joq, alaida dáriger Muhammedtiń ońalýy men qalpyna kelýine naqty qansha ýaqyt ketetinin aitýǵa qinaldy.
"Nege ekenin bilmeimin, áiteýir bárine ýaqyt faktory qyzyq. Biraq biz úshin bastysy ýaqyt emes. Eń bastysy – densaýlyǵynyń ońalǵany", — dedi Diachenko.
Mamannyń aitýynsha, jaqyn arada balaǵa taǵy bir operatsiia jasalady.
"Qazir naqty ýaqytyn aitý qiyn, biraq oǵan taǵy bir ota jasaý qajet. Bul bas súieginiń plastikasy. Onyń súiegi bizde saqtalǵan. Ol osydan birneshe jyl buryn bizdiń emhanada ázirlengen ádisteme boiynsha konservilengen", — dep túiindedi Nikolai Diachenko.
Shyǵys ainalma jolynan tabylǵan balaǵa ne boldy?
16 shilde kúni politsiiaǵa jol apatyna kináli adam búldirshindi qaǵyp, ony kórpege orap tastap ketkeni týraly aqparat túsedi. Ol kezde aýdandyq IIB-ǵa balanyń ákesi kómek surap júgingen edi. Er adamnyń aitýynsha, ol jumysqa ketkende, ulynyń sońynan ere shyqqanyn baiqamaǵan, al tragediia týraly áleýmettik jelilerden bilipti. Sol joly balanyń ákesi BAQ arqyly apat kýágerlerine júginip, habarlasýyn ótingen edi.
Tórt jasar Muhammed tabylǵannan keiin birden balalar aýrýhanasyna jetkizildi. Oyń jaǵdaiy óte aýyr dep baǵalanǵan edi. Operatsiia jasaldy.
Politseiler oqiǵa ornynan izin jasyrǵan júrgizýshini eki aptadan astam ýaqyt boiy izdedi. Sonymen qatar basqa da nusqalar qarastyryldy. Barlyq fakti men beinebaqylaý kameralarynan alynǵan videolardy zerdelegennen keiin, tergeýshiler eshqandai jol apaty bolmaǵanyn anyqtady.
1 tamyz kúni Almaty ishki ister departamenti osy iske qatysty video taratty. Onda Muhammediń ákesi ulyn mazasyn ala bergeni úshin taspen urǵanyn, osy ýaqyt boiy politsiia men jurtshylyqty ádeii jańylystyrǵanyn moiyndady.
Atalǵan oqiǵaǵa qatysty sotqa deiingi tergeý jalǵasýda.
