68 jastaǵy naýqas Ortalyq qalalyq klinikalyq aýrýhanaǵa sol aiaǵynyń qatty aýyrsynýyna shaǵymdanyp tústi, dep habarlaidy QazAqparat.
Ortalyq qalalyq klinikalyq aýrýhananyń baspasóz qyzmetiniń málimetinshe, dárigerler patsientke birneshe diagnoz qoiǵan.
Atap aitqanda, aiaǵynyń qan tamyrlarynyń tarylý aterosklerozy, sol jaǵynan jambas tamyrlarynyń ústiniń okkliýziiasy, sol jaq aiaǵynyń 4-satydaǵy sozylmaly ishemiiasy.
«Aýrý aiaqtaǵy qan ainalymynyń kúrdeli jetispeýshiligine ákeledi, naýqastardy qatty azapqa túsirip, adam óz betimen júre almai qalady. Ókinishke qarai, patsientterdiń kóbi aiaǵy aýyrǵanda ony jas ereksheligine bailanysty bulshyq ettiń jai ǵana álsizdenýi dep oilaidy nemese aýrýdy aiaq sińiriniń túiilýi sekildi kók tamyrdaǵy problemaǵa uqsatady. Osylaisha, meditsinalyq kómekke júginýdi artqa shegindirip tamyrynyń zaqymdaný satysyn tereńdete túspek. Mundai jaǵdaida patsienttiń jambasynan bastap aiaǵyn kesý qaýpi tónip turdy, oǵan shuǵyl operatsiia jasaýǵa májbúr boldyq»,-deidi qan tamyrlary júiesiniń hirýrgy Sultan Ileev.
Dárigerdiń aitýynsha, mundai diagnozdyń kópke sozylýy aiaqtyń irińdep ketýi sebebinen kesip tastaýyna ákep soǵady.
Kesip tastaý qaýpi joǵary bolǵan kezde ólim deńgeii 25%-ǵa ósedi.
Osymen qatar, patsientterdiń 50% «kritikalyq ishemiia» degen diagnozdan soń aiaǵyn kespegen jaǵdaidyń ózinde jyl aralyǵynda qaitys bolady.
«Patsientke tent jáne ballondy angioplastik qoiyldy. Bul operatsiia shaǵyn invazivti (az jaraqatty) sanalady jáne qan tamyryna úlken operatsiia jasaýdan aman alyp qalady, sondai-aq, onyń bitelip qalǵanynda sozylmaly tamyr jetispeýshiliginiń oryn alýyna jol bermeidi»,- deidi dáriger.
Qazirgi ýaqytta naýqastyń jaǵdaiy jaqsy. Ony aýrýhanadan shyǵarýǵa daiyndap jatyr.
