Almatylyq infektsionist dáriger álemde Kavasaki sindromynyń taralýyna bailanysty ata-analarǵa balalaryna baqylaýdy kúsheitý kerektigin aitty, dep habarlaidy "Ult aqparat".
Óńirlik kommýnikatsiialar qyzmeti alańyndaǵy onlain-suhbat barysynda Almaty qalalyq balalar klinikalyq infektsiialyq aýrýhanasynyń dáriger-sarapshysy, balalar juqpaly aýrýlary kafedrasynyń meńgerýshisi, meditsina ǵylymdarynyń doktory, professor Ǵaliia Quttyqojanova, ata-analardan balalar arasyndaǵy aýrýdyń aldyn alýǵa jaýapkershilikpen qaraýdy surady.
«Ata-analar balalarmen kóp jerlerde júrmeýi kerek, syrtqy bailanystardy azaityp, maska taǵý kerek. Kóshede tamaq ishpeý, gigienany saqtaý, immýnitetti arttyrý qajet. Asqynǵan jaǵdaida ózin – ózi emdeýmen ainalyspai, dárigerlerge júginý kerek», – dep eskertti G. Quttyqojanova.
Epidemiologiialyq turaqsyzdyq kezeńinde sanitarlyq talaptardy elemegen jaǵdaida balalarda aýyr asqynýlar bolýy múmkin.
«Sáýir aiynan keiin jańa sindrom - Kavasaki paida boldy. Bul sindrom jii kezdespeidi, biraq óte aýyr aýrýlarǵa jatady. Covid-19-ben bailanysty bolýyna kúdik bar. Kavasaki aýrýy-bul bezgek, kem degende 5 kún bolady. Sonymen qatar, kelesi belgiler bar: kózdiń qyzarýy, aýyz qýysynyń shyryshty qabyǵynyń giperemiiasy, erinniń zaqymdanýy, bórtpe, murynnyń qabyrshaqtanýy, aiaq - qol men tabannyń isinýi jáne giperemiiasy (qyzarýy), moiyn limfa túiinderiniń ulǵaiýy», - dedi ol.
Sonymen qatar, ol balalarda Kavasaki belgileri tolyq baiqalmaýy múmkin ekenin atap ótti. Alaida, júrek asqynýyn boldyrmaý úshin olardy ajyratý jáne emdeýdi bastaý qajet jáne antibiotikterdi jónsiz paidalanbaý kerek.
«Balalarǵa virýsqa qarsy preparattardy qoldaný usynylmaidy. Balalarǵa simptomatikalyq em qoldaný kórsetiledi. Aýrýdyń belgileri jáne virýstyń aǵzalardaǵy áreketi nátijesinde paida bolǵan protsester emdeledi. Kavasaki sindromy paida bolǵan kezde toptyń konsiliýmyn júrgizý qajet. Oǵan infektsionister, revmatologtar, kardilogtar jáne reanimatologtar kirýi tiis», - dedi G.Quttyqojanova.
Sonymen qatar, ol 1-2 synyp oqýshylaryna oqýdyń ereksheligine bailanysty mektepke kúndizgi bólimde barýǵa ruqsat etiletinin atap ótti.
« Meniń oiymsha, 3-4 synyp oqýshylary muǵalimderin kórdi, mektepte bilmi aldy. Sondyqtan olar qashyqtan oqi alady. Al 1-2 synyp oqýshylary saqtyq sharalaryn saqtap, oqýy kerek», - dep tolyqtyrdy dáriger.
