№4 qalalyq aýrýhana dárigerleri almatylyq boijetkenniń ishinen 1 keli shash alyp shyqty, dep habarlaidy "Ult aqparat".
17 jastaǵy boijetken asqazanynyń epigastrii aimaǵy aýyryp túsken. Oǵan fibrogastrodýodenoskopiia (FGDS), kompiýterlik tomografiia jasalǵan. Nátijesinde onyń asqazanynda shashtyń jumarlanǵan túinegi (trihobezoar) bar ekeni anyqtaldy.
Bezoar kóbinese kúiseitin janýarlarda jii kezdesedi. Adamdar arasynda ondai jaǵdai óte sirek bolady.
Patsient asqazanynda shash barynan beihabar bolǵan.
«Búgin josparly ota jasaldy. Laparotomiia, gastrotomiia, otasy kezinde asqazan pishinin qaitalap turǵan trihobezoar anyqtaldy. Bul túinek asqazannyń 70 paiyz aýdanyn alyp turǵan. Boijetkenniń ózi shash jegenin moiyndamai tur. Alaida bul birneshe jyldar boiy qalyptasqan túinek. Onyń salmaǵy 1 kelige jetip qalǵan soń asqazannyń pishini sozylǵan», - dedi aýrýhana hirýrgy Abylai Baimahanov.
Tájiribede trihobezoar óte sirek kezdesedi. Odan keletin qaýip joǵary.
Konkrement asqazan-ishek jolymen qozǵalý kezinde asqazannyń bitelýine nemese asqazannyń tesilýine alyp kelýi múmkin boldy. Dárigerlerdiń aitýynsha, bul jaǵdaida naýqas meditsinalyq kómekke ýaqytynda júgingen.
«Tyrnaq tisteý nemese shash shainap jutý – bul psihologiialyq ádet. Balalardyń ádetterine erte jastan nazar aýdarý kerek. Sondai - aq, shash aǵzaǵa tamaqpen birge ketip, jyldar boiy massaǵa jinalýy múmkin», - dep tolyqtyrdy hirýrg-dáriger, assistent Dáýren Jýmataev.
Kóbinese bul dert 30 jasqa deiingi qyz balalarda kezdesedi.
Aýrýdyń bastalýy ádette simptomsyz bolady. Bezoar ósip kele jatqanda, ish aýyryp, aýyrlyq sezimi paida bolady, júrek ainý, qusý, tábettiń tómendeýi, temir tapshylyǵynyń anemiiasy damidy. Bezoardyń asqynýy - eroziia jáne qan ketetin asqazan jaralary, peritonittiń damýy, ash ishektiń obtýratsiiasy bolyp tabylady.
