Foto: Úkimet
QR Premer-ministri Oljas Bektenovtiń tóraǵalyǵymen ótken Úkimet otyrysynda týristik salany damytý jáne tsifrlandyrý jónindegi sharalar qaraldy, dep habarlaidy Ult.kz.
Memleket basshysynyń Almaty qalasyn damytý jáne megapolis ekonomikasyn ártaraptandyrý maqsatynda týristik áleýetti tiimdi paidalaný jónindegi tapsyrmalaryn oryndaýǵa erekshe nazar aýdaryldy.
Qala ákimi Erbolat Dosaevtyń aitýynsha, ótken jyly Almatynyń týristik salasy qarqyndy ósim kórsetti. 2024 jyly týristerdiń jalpy sany 14,8%-ǵa ósip, 2,3 mln týristti qurady.
«Sheteldik týrister sany 27%-ǵa artyp, 680 myńnan astam adamǵa jetti. Ishki týrister sany 10,4%-ǵa artyp, 1,6 mln adamnan asty. Nátijesinde kórsetilgen týristik qyzmetter kólemi 30%-ǵa ósip, 96,3 mlrd teńgeni qurady. Almatyǵa Úndistan, Qytai, AQSh, Túrkiia, Ońtústik Koreiadan týrister keledi», — dedi Erbolat Dosaev.
Onyń aitýynsha, týrizmdi damytý investitsiialardyń ósýin yntalandyrdy: salanyń negizgi kapitalyna 110,9 mlrd teńge salyndy, bul ótken jylmen salystyrǵanda 2,1%-ǵa artyq. Týrizmnen túsetin salyq túsimderi 92,1%-ǵa ósti.
Týristik salada 83,5 myń adam jumyspen qamtylǵan, ortasha jalaqy kólemi 480 myń teńgeni quraidy. 2025 jyly sheteldik týrister sany 10%-ǵa artyp, 750 myń adamǵa deiin ósedi dep kútilýde.
