Almatyda koronavirýspen kúreske arnalǵan fotokórme ashyldy, dep habarlaidy "Ult aqparat".
Bul bastamany Óńirlik kommýnikatsiialar qyzmeti kóterdi. Munyń aldynda qala turǵyndary men qonaqtary COVID-19-ben kúresti nasihattaý jónindegi áleýmettik jobaǵa qatysýǵa shaqyrylǵan edi.
Fotokórmede turǵyndar jibergen sýretterden arnaiy komissiia tańdap alǵan 10 fotojumys pen grafikalyq sýret qoiylǵan. Arnaiy komissiia quramyna Almaty qalasynyń Mádeniet basqarmasynyń kontserttik bóliminiń basshysy Ainur Bajenova, Eýraziia Mádeni Aliansy direktorynyń orynbasary Olga Veselova, jeke, aýdiovizýaldy jáne foto qujattardy jinaqtaý bóliminiń muraǵatshysy Álim Haidarov kirdi.
Ár jumysta COVID-19-ben kúres kórinis tapqan. Meditsina qyzmetkerleriniń, epidemiologtardyń, politsiianyń, eriktilerdiń jumys kadrlary men almatylyqtardyń pandemiiamen kúrestegi kózqarastary beineleý túrinde berilgen.
Jobanyń basty maqsaty – yqtimal jańa tolqyn qarsańynda sanitarlyq normalardy, ásirese maska taǵý rejimin ustanýdyń mańyzdylyǵyn, pandemiiamen kúreste aldyńǵy shepte tabylatyn jandardyń (meditsina qyzmetkerleri, epidemiologtar, politsiia, eriktiler t.b.) jumysynyń qundylyǵyn turǵyndardyń esine salý.
«Osy fotokórmeni uiymdastyra otyryp, biz qala turǵyndaryn aldyn alý sharalaryn kúsheitýge shaqyrǵymyz keldi. Betperde taǵyp, áleýmettik qashyqtyqty saqtaý arqyly árbir adam qalanyń COVID-19-ben jalpy kúresine úlken úles qosady. Jalpyǵa ortaq sharalardyń arqasynda dárigerler men meditsina qyzmetkerlerine júktelgen kúsh azaiyp, juqtyrý sany kemýi múmkin», - dedi óńirlik kommýnikatsiialar qyzmetiniń ókilderi.
Bul jobaǵa yqylas bildirgen kez kelgen adam qatysa aldy. Ol úshin 5 fotosýret nemese basqa da grafikalyq sýretti (karikatýra, illiýstratsiia) jiberýi, eń basty shart erekshe kontent qoldaný bolatyn.
«Fototilshi retinde men koronavirýspen bailanysty jaǵdaidy alǵashqy kúnderden bastap túsire bastadym. Qyzyq, keide tipti qorqynyshty boldy. Bos qala, blok beketter, asyǵyp bara jatqan jedel járdem kólikteriniń sirenasy jáne taǵy basqa oqiǵalar erekshe este qaldy. Alaida jumys oqiǵa ornynda bolýymdy qajet etti, onsyz halyqqa qalada ne bolyp jatqanyn kórsetý múmkin bolmas edi», - deidi fotokórmege qatysýshy Oleg Spivak.
Al Talǵat Galimov óziniń jumystary arqyly qala turǵyndaryna qaýipsizdik sharalaryn saqtaýǵa shaqyrǵysy kelgenin aitty.
«Men adamdarǵa pandemiia men karantin kezinde ózimizdi qalai ustaýymyz kerektigin kórsetkim keldi. Eń bastysy - osyndai qiyn kezde adamdar bir-birine qurmet kórsetýdi umytpai, birine-biri qamqor bolýlary kerek. Adamdardyń osy dertke qatysty dúnietanymdary keńeiip, kóbirek jaýapkershilik tanytyp, qaýipsizdik sharalaryn ustansa, qashyqtyqty saqtap, betperde kiip júrse degim keledi. Sebebi bizden basqa muny eshkim jasamaidy. Eger osyny ustanbasaq, bárimiz aýyryp qalamyz», - dedi Talǵat Galimov.
Almaty ákimdigi álemdegi epidemiialyq jaǵdaidyń ýshyǵa túskenin eskere otyryp, qala turǵyndaryn aldyn alý sharalaryn qatań saqtaýǵa jáne sanitarlyq-epidemiialyq sharalardy ustanýǵa shaqyrady.
Jyljymaly fotokórme qalanyń ár aýdanynda 12 qarashadan 19-qarashaǵa deiin saǵat 10:00-20:00 aralyǵynda ótetin bolady:
13 qarasha - Alataý aýdany, «ALATAÝ» saýda ortalyǵy, Rysqulov dańǵyly, 103/3;
14 qarasha - Áýezov aýdany, «GRAND PARK» saýda ortalyǵy, Qabdolov kóshesi, 1;
15 qarasha - Túrksib aýdany, «MART» SOO, Rihard Zorge kóshesi, 18/4;
16 qarasha - Jetisý aýdany, «MAXIMA» SOO, Raiymbek dańǵyly, 239g;
17 qarasha - Bostandyq aýdany, «ATAKENT MALL» SOO, Timiriazev kóshesi, 42 k3;
18 qarasha - Almaly aýdany, «TsÝM» saýda úii, Abylai han dańǵyly, 62/ Jibek joly dańǵyly, 85;
19 qarasha - Naýryzbai aýdany, Naýryzbai aýdanynyń HQKO, Shuǵyla shaǵyn aýdany, 347/1.
Sondai-aq, qalanyń Samal 2 shaǵyn aýdany, 111 mekenjaiyndaǵy (Medeý aýdany) «DOSTYK PLAZA» SOO-nyń LED-ekrandarynan da kórsetiletin bolady.
