Almatydaǵy Qazaq ulttyq agrarlyq ýniversitetine Álihan Bókeihannyń esimin berý zańnamada belgilengen tártippen qaralady. Bul jaiynda Májilis depýtattarynyń saýalyna QR Premer-Ministriniń orynbasary Eraly Toǵjanovtyń jaýabynda aitylǵan, dep habarlaidy QazAqparat.
«2020 jyly QR Aýyl sharýshylyǵy ministrligine qarasty Qazaq orman sharýashylyǵy jáne agromelioratsiia ǵylymi-zertteý institýtyna Á.Bókeihannyń esimi berildi. Sonymen qatar Almaty qalasyndaǵy Qazaq ulttyq agrarlyq ýniversitetine Á.Bókeihannyń esimin berý máselesi zańnamada belgilingen tártippen qaralady», - dedi Eraly Toǵjanov.
Úkimet basshysy orynbasarynyń atap ótýinshe, Álihan Bókeihannyń esimi Qaraǵandy oblysynda erekshe ulyqtalyp keledi. 1998 jyly Aqtoǵai aýdanynda «Úsh arys» (Á.Bókeihan, J.Aqbaev, Á.Ermekov) eskertkishi ornatyldy. Qazirgi tańda eskertkish turǵan jer «Alash» alańy dep atalady. 2013 jyly Á.Bókeihannyń týǵan jeri − Aqtoǵai aýdanynda, Jekejal qystaýynyń orny topyraqtan arshylyp, irgetasy retke keltirildi. 2016 jyly Aqtoǵaidaǵy Á.Bókeihan atyndaǵy mektep aldynda oǵan arnalǵan biýst qoiyldy. 2019 jyly Qarqaraly qalasynda Alash arystary Álihan Bókeihan, Ahmet Baitursynuly jáne Álimhan Ermekovke arnalǵan eskertkish ornatyldy.
«Álihan Bókeihannyń 155 jyldyq mereitoiy qarsańynda biyl Qaraǵandy qalasyndaǵy Oktiabr aýdanyna ult qairatkeriniń esimi berildi. Jalpy óńirde Á.Bókeihannyń esimi 11 kóshe, 4 mektepke tirkelgen. Shymkent qalasynda, Aqmola, Aqtóbe, Atyraý, Jambyl, Qyzylorda, Pavlodar, Soltústik Qazaqstan, Túrkistan, Shyǵys Qazaqstan oblystarynda Á. Bókeihannyń esimi kósheler men mektepterge berilgen, - dedi vitse-premer.
