Almatynyń 2-shi jylý elektr ortalyǵyn tolyq gazǵa kóshirý 2026 jyly aiaqtalady. Bul týraly brifing barysynda QR Energetika ministri Bolat Aqsholaqov málim etti, dep habarlaidy QazAqparat.
Ministrdiń sózinshe, «Samuryq Qazyna» qory Qazaqstannyń biryńǵai energetikalyq júiesindegi jiilik pen qýatty retteý múmkindigimen Almatynyń 2-shi jylý elektr ortalyǵynda qýaty 600 MVt-qa deiingi bý-gaz qondyrǵysyn salý jobasyn iske asyrý jóninde usynys berdi.
«Almaty JEO-2-ni tolyq gazǵa kóshirý 2026 jyly aiaqtalady dep josparlanýda. Qor alǵashqy iske qosý keshenin (bý-gaz qondyrǵysy - 200 MVt) 2023 jyldyń sońyna qarai paidalanýǵa berýdi kózdep otyr», - deidi Bolat Aqsholaqov.
Sonymen qatar, ol memlekettik saraptama nátijeleri boiynsha jobanyń quny 324 mlrd teńge ekenin atap ótti.
«Sondai-aq «Samuryq-Qazyna» bý-gaz qondyrǵylaryn sala otyryp, 1-shi jáne 3-shi jylý elektr ortalyqtaryn keńeitýdi josparlap otyr. Almatynyń 1-shi jylý elektr ortalyǵyn aýystyrý jobasy jalpy qýaty 250 MVt-qa deiin bý-gaz qondyrǵylaryn ornatý arqyly stantsiiany keńeitýdi kózdeidi. Qazirgi ýaqytta jobanyń tehnikalyq-ekonomikalyq negizdemesin ázirleý boiynsha jumystar júrgizilýde», - deidi ministr.
Bolat Aqsholaqov Almaty JEO-3 jylý elektr ortalyǵyn rekonstrýktsiialaýdyń barlyq yqtimal tehnologiialyq nusqalaryn taldaý úshin «Almaty elektr stantsiialary» kompaniiasy janynan jumys toby qurylǵanyn aitty.
Búgingi tańda jobanyń tehnikalyq-ekonomikalyq negizdemesi ázirlený ústinde.
