QR Indýstriia jáne infraqurylymdyq damý ministrligi Azamattyq aviatsiia komitetiniń tóraǵasy Talǵat Lastaev Almaty túbindegi áýe apatynda qaza tapqandar týraly derekterdiń nelikten ártúrli bolǵandyǵyn aitty, dep habarlaidy QazAqparat.
Onyń aitýynsha, áýe apaty kezinde qaza tapqandardyń sany týraly resmi aqparatty berýge QR Ishki ister ministrliginiń Tótenshe jaǵdailar komiteti ǵana berýge quqyly.
«12 adam qaza tapty, bul — atalǵan vedomstvo (IIM) taratqan málimet. Túrli derekterdiń bolǵandyǵy da túsinikti. Degenmen, baspasóz máslihatynda vitse-premer jariia etken jáne úkimettik komissiia otyrysynda aitylǵan sanǵa sáikes 12 adam qaza boldy», - dedi ol Ortalyq kommýnikatsiialar qyzmetindegi baspasóz máslihatynan keiin BAQ ókilderine bergen suhbatynda.
Komitet basshysynyń naqtylai túsýinshe, mundai qaiǵyly jaittar kezinde resmi statistika berýge Ishki ister jáne Densaýlyq saqtaý ministrlikteriniń ǵana quqyǵy bar.
«15 adamnyń qaza tapqandyǵy týraly habarlama bastapqy aqparat bolýy yqtimal. Alaida, resmi statistikany memlekettik organdardan Densaýlyq saqtaý ministrligi men Ishki ister ministrligi ǵana berýge quqyly. QR IIM Tótenshe jaǵdailar komiteti de qaza tapqandar týraly aqparat bere alady. Óitkeni, izdeý jáne qutqarý operatsiiasyn Tótenshe jaǵdailar komiteti úilestiredi. Ákimdiktiń quqyǵy joq», - dedi Talǵat Lastaev.
Esterińizde bolsa, keshe Almaty qalalyq qoǵamdyq densaýlyq saqtaý basqarmasynyń basshysy Tileýhan Ábildaev «Bek Eir» ushaǵynyń apatqa ushyraýy saldarynan qaza tapqan adamdardyń sany 15-ke jetkenin aitqan edi.
