Ál-Farabi, Sain, Shyǵys ainalma jolyndaǵy jyldamdyq rejimin saqtamaǵandarǵa eskertý jasalady, dep habarlaidy "Ult aqparat" qalalyq PD silteme jasap.
Búginnen bastap Ál-Farabi, Sain, Shyǵys ainalma jolyndaǵy jol jyldamdyǵy saǵatyna 80 shaqyrymnan 60 shaqyrymǵa túsirildi.
«Buǵan sáikes jol belgileri quzyrly organdarmen birige otyryp ornatyldy. Búgin «Jol qozǵalysy qaýipsizdigi avtomatty aqparattyq júiesiniń» baptaýlary ózgertilip jatyr. Erteńnen bastap jol erejesin buzǵan júrgizýshilerge turǵylyqty mekenjaiy boiynsha eskertý jiberiletin bolady. Bul júrgizýshilerdi ózgeriske úiretýge qajet shara. Aqparattyq habarlandyrý jumystary birneshe ai kóleminde júrgizilip keledi», - dedi PD Ákimshilik politsiiasy basqarmasynyń bastyǵy Jandos Murataliev.
Politsiia álemdik tájiribeniń ozyq úlgilerin mysalǵa keltiredi. London, Niý-Iork qalalarynda osyndai shekteýden soń jol apaty kórsetkishi kúrt azaiǵan.
«Jyl basynan beri Almatyda 4 203 jol apaty bolǵan. Onyń basym kópshiligi jyldamdyq 60- 80 km/saǵ trassalarda boldy. Ortasha eseppen kúnine 12 jol apaty tirkelgen. Almatyda byltyr jyl basynan beri 121 adam kóz jumǵan. Iaǵni, ár úsh kún saiyn Almatyda 1 adam kóz jumady. Álemdik tájiribede osyndai statistikany azaitý úshin jol qozǵalysy jyldamdyǵyn azaitý qoldanylady. DDU málimetinshe, jyldamdyqtyń 5%-ǵa artýy adamdarǵa jaraqat keltiretin jol apatynyń 10%-ǵa, adam ólimine soqtyratyn jol apatyn 20%-ǵa artyrady.
Odan bólek sarapshylardyń aitýynsha, jyldamdyqtyń azaiýy jol uzaqtyǵyn tek 2 minýtqa ǵana arttyrady. Eger osy eki minýtta bir adamnyń ómirin saqtap qalý múmkin bolsa, onda bul shekteýdi engizgenimiz beker emes»- dedi qalalyq PD-nyń resmi ókili Saltanat Ázirbek.
