Foto: © Sputnik / Abzal Kaliev
Almatydaǵy Qalalyq josparlaý jáne ýrbanistika basqarmasynyń eks-basshysy ustaldy, - dep habarlaidy "Ult aqparat" Antikor baspasóz qyzmetine silteme jasap.
Sybailas jemqorlyqqa qarsy qyzmet jemqorlyq táýekelderin syrtqy taldaý nátijeleri boiynsha Almaty qalasynyń jer qatynastary salasyndaǵy júieli jemqorlyq faktilerine qatysty qylmystyq isterdi tirkep, tergep jatyr.
"Qalalyq josparlaý jáne ýrbanistika basqarmasynyń basshysy jer ýchaskelerin berý jáne obektilerdiń qurylysyn kelisý kezinde laýazymdyq ókilettikterin asyra paidalandy degen kúdikke ilindi.
Máselen, ol 2020-2023 jyldary jeke turǵyn úi qurylysyna arnalǵan jer ýchaskelerinde, nysanaly maqsatyna qaramastan jáne qurylystyń tyǵyzdyǵyn eskermei, jekelegen qurylys kompaniialarynyń múddesi úshin 3 kóppáterli turǵyn úi kesheniniń qurylysyn zańsyz kelisken. Nátijesinde memleketke 307 mln teńgeden astam somaǵa jer ýchaskeleriniń tólenbegen kadastrlyq quny túrinde zalal keltirildi.
Budan basqa, 2020 jyly meditsinalyq ortalyq pen HQKO-nyń qurylysyn zańsyz kelise otyryp (investitsiialyq jobalardy iske asyrý túrimen), múddeli tulǵalardyń jeke menshigine jer ýchaskelerin tómen quny boiynsha odan ári negizsiz berýge yqpal etti. Shyǵyn 180 mln teńgeni qurady" - delingen habarlamada.
Sottyń sanktsiiasymen kúdikti qamaýǵa alyndy. Sotqa deiingi tergep-tekserý jalǵasyp jatyr. Basqa laýazymdy adamdardyń qatystyǵy tekserilýde.
Qylmystyq-protsestik kodeksiniń 201-babyna sáikes tergeý múddesi úshin ózge de aqparat jariia etýge jatpaidy. Konstitýtsiianyń 77-baby 3-tarmaǵynyń 1-tarmaqshasyna jáne Qylmystyq-protsestik kodeksiniń 19-baby 1-bóligine sáikes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deiin árbir adam kinásiz dep esepteledi.
