Foto: Almaty ákimdigi
Almatydaǵy Túrksib aýdanynyń ekonomikasy turaqty ári serpindi damyp otyr. Bul týraly qala ákimi Erbolat Dosaev aýdan turǵyndarymen kezdesý barysynda aitty. Qala basshysynyń aitýynsha, negizgi kapitalǵa salynǵan investitsiia 9 aidyń ishinde 21%-ǵa, onyń ishinde jeke investitsiia 27%-ǵa ósken. Barlyǵy 150 mlrd teńge investitsiia tartyldy, – dep habarlaidy Ult.kz Almaty qalasy ákiminiń baspasóz qyzmetine silteme jasap.
«Aýdanda jumys istep turǵan biznes sýbektileriniń sany 7,8%-ǵa ósti. Búgingi kúni aýdanda 29 myńnan astam biznes sýbektisi belsendi jumys istep jatyr, bul salyq túsimin 164 mlrd teńgege deiin ulǵaitýǵa, sondai-aq 3,5 myń jańa turaqty jumys ornyn ashýǵa múmkindik berdi», - dedi Erbolat Dosaev.
2024 jyly aýdannyń biýdjeti ótken jylmen salystyrǵanda 4 ese ulǵaidy. Máselen, 2023 jyldyń basynda biýdjet 5,4 mlrd teńge bolsa, 2024 jyldyń basynda ol 21,3 mlrd teńgege jetti.
"2024 jyldyń maýsymynda aýdan biýdjeti taǵy 9%-ǵa ósip, 23,5 mlrd teńgege jetti, bul injenerlik jáne jol infraqurylymyn jańǵyrtýǵa, sondai-aq qoǵamdyq keńistikterdi kóriktendirýge baǵyttalǵan jobalardy júzege asyrýǵa múmkindik berdi", - dep atap ótti Almaty ákimi.
Aita keteiik, Almaty qalasynyń ekonomikasynda jalpy joǵary investitsiialyq belsendilik baiqalady.
Biylǵy 9 aidyń qorytyndysy boiynsha negizgi kapitalǵa 1 133 mlrd teńge investitsiia tartylyp, ósim 8,1% boldy. 2024 jyldyń basynan beri jergilikti biýdjetke túsim 27,2%-ǵa ósti, bul «Almatyny damytý baǵdarlamasy 2025 jylǵa deiin jáne 2030 jylǵa deiingi orta merzimdi perspektivasy» aiasynda basym jobalardy qarjylandyrýdy ulǵaitýǵa múmkindik berdi. 2024 jyldyń basynan bastap Almatynyń biýdjeti 204,5 mlrd teńgege kóbeiip, 1 828,5 mlrd teńgege jetti.
