Foto ©️ Tengrinews.kz / Sviatoslav Antonov
Almatyda lai kóshkininen qaza tapqan otbasynyń bir uly qaldy, - dep habarlaidy "Ult aqparat" Tengrinews.kzke silteme jasap.
Almaty ákiminiń tapsyrmasy boiynsha otbasynyń barlyq múshelerin jerleýdi uiymdastyrý úshin kómek kórsetiledi. Stýdent jáne qazirgi ýaqytta elden tys jerde oqityn qaza bolǵan otbasynyń úlken ulyna bilim alýǵa jáne elimizge kelgen soń ómir súrýine materialdyq qoldaý kórsetiletin bolady.
Erbolat Dosaev lai kóshkini saldarynan qaza tapqandardyń týystary men jaqyndaryna kóńil aitty jáne olardy jerleýdi uiymdastyrýǵa kómek kórsetýdi tapsyrdy.
Almaty qalasynyń ákimi Erbolat Dosaev qaitys bolǵan otbasynyń týystary men jaqyndaryna kóńil aitty.
Tehnogendik sipattaǵy lai kóshkini saldarynan qiraǵan úi astynan 1984 jylǵy er adamnyń, 1980 jylǵy áieldiń jáne 2007 jylǵy egiz jasóspirimder óli tabyldy.
"Qutqarý qyzmeti Medeý aýdanyndaǵy qiraǵan úide turǵan otbasy múshelerin izdeýdi aiaqtady. Qaiǵyly oqiǵa 4 adamnyń ómirin qidy. Men qaza bolǵandardyń týystary men jaqyndarynyń qaiǵysyna ortaqpyn. Olarǵa shyn júrekten qatty qaiǵyryp, kóńil aitamyn", - dedi Erbolat Dosaev.
Eske salaiyq, 8 aqpanda túngi saǵat 2-20-da Medeý aýdany, Olimpiiskaia kóshesiniń boiynda tehnogendik topyraqtyń lailanýynan lai kóshkini júrgeni habarlandy. Tótenshe jaǵdai saldarynan úilerge zaqym keldi. Kólemi 3200 tekshe metr bolatyn jyljyma túsken. Eki jeke turǵyn úige, onyń ishinde bireýine ishinara zaqym kelgen.
Keiinirek Almaty ákimi Erbolat Dosaev lai kóshkini bolǵan jerge baryp, shuǵyl túrde kóshpeli keńes ótkizdi.
Al Tótenshe jaǵdailar departamenti ókili turǵyn úilerdiń biriniń astynda tórt adam qalýy múmkin ekenin, onyń ekeýi bala, ekeýi eresek adam ekenin málimdep, qutqarý jumystary júrip jatqanyn aitty.
Artynsha úide bolǵan tórt adam da óli tabyldy.
