Almatyda jappai tártipsizdik kezinde zardap shekken jeke tulǵalarǵa ótemaqy tólenedi. Bul týraly Almatynyń tynys-tirshiligin qalpyna keltirý jónindegi qalalyq shtab otyrysynda qala ákiminiń orynbasary Iliias Óserov aitty, dep habarlaidy QazAqparat.

Almatyda bolǵan tártipsizdikter kezinde memlekettik organdardyń, aýrýhanalar men BAQ-tyń 603 qyzmetkeri zardap shekken. Onyń ishinde, quqyq qorǵaý organdarynyń 592 qyzmetkeri, Tótenshe jaǵdailar departamentiniń 1 qyzmetkeri, jergilikti atqarýshy organdardyń 3 qyzmetkeri, «Almaty» telearnasynyń 1 qyzmetkeri jáne meditsinalyq uiymdardyń 6 qyzmetkeri bar. Olardyń barlyǵyna ótemaqy tólenedi. 

Almaty qalasy ákiminiń orynbasary Iliias Óserovtyń aitýynsha, zardap shekkenderge tólemder kelesi dárejelerge qarai beriledi. Aýyr dárejede zardap shekkender – 2 mln teńge, ortasha dárejede – 1 mln teńge, jeńil túrde – 500 myń teńge tólenedi. 

Sonymen qatar, qalada tótenshe jaǵdai kezinde jumyldyrylǵan Politsiia departamentiniń 3878 qyzmetkerine, Tótenshe jaǵdailar departamentiniń 1207 qyzmetkerine, Qoǵamdyq densaýlyq basqarmasynyń 3888 qyzmetkerine, qutqarý qyzmetiniń 93 qyzmetkerine 100 myń teńge qarjylai kómek tólenedi. 

«Búgin tiisti qujattar qazynashylyqqa jiberilip, tústen keiin alǵashqy tólemder jasalady», - dedi Iliias Óserov. 

Sondai-aq, tiisti tergeý áreketteri aiaqtalǵan soń zardap shekken avtokólikterge tólemderdi qamtamasyz etý úshin Politsiia departamentine shamamen 200 mln teńge mólsherinde bastapqy soma jiberiletin bolady. Qajet bolǵan jaǵdaida bul soma kóbeitiledi.