Almatyda denesi órtengen kúide tabylǵan politsiia qyzmetkeriniń ólimine qatysty tergeýde jańa derekter paida boldy. Buǵan deiin bul is boiynsha marqumnyń jubaiy men bir uly kúdikke ilingeni habarlanǵan bolsa, endi beiresmi málimetterge sáikes, ekinshi uly da kúdiktiler qatarynda, dep habarlaidy ult.kz.
Tergeý nusqasy boiynsha, qaiǵyly oqiǵa bolǵan kúni politsiia qyzmetkeri úiine kesh oralǵan. Osydan keiin otbasynda janjal týyndaǵan.
Time.kz saitynyń jazýynsha, marqumnyń jubaiy buryn politsiia qyzmetinde bolǵan, alaida biyl aqpan aiynda jumystan ketken. Sondai-aq jaqyndarynyń aitýynsha, er adam otbasynda jii janjal shyǵaryp, áieline kúsh kórsetken bolýy múmkin. Alaida bul aqparatqa qatysty resmi rastaý joq.
Aldyn ala málimet boiynsha, janjal kezinde úide erli-zaiyptylardyń 15 jastaǵy eki uly (olardyń biri asyrap alynǵan bolýy múmkin) jáne 14 jastaǵy dosy bolǵan. Tergeý boljamyna sáikes, jasóspirimderdiń biri marqumnyń basynan qatty zatpen soqqy jasaǵan.
Beiresmi aqparatqa sáikes, marqumnyń jubaiy, eki uly jáne 14 jastaǵy jasóspirim Almaty oblysy Talǵar aýdandyq politsiiasynyń ýaqytsha ustaý izoliatoryna qamalǵan. Keibir málimetterde olardyń kúdikti moiyndaǵany aitylǵanymen, bul aqparatty quqyq qorǵaý organdary resmi túrde rastaǵan joq.
Isti tergeý úshin arnaiy jedel-tergeý toby qurylýy múmkin. Sebebi oqiǵa Almaty qalasynda bolǵanymen, máiit Almaty oblysynyń aýmaǵynan tabylǵan.
Aita keteiik, bul qylmystyq is qoǵamda úlken rezonans týdyrdy. Tergeý jalǵasyp jatyr, al istiń túpkilikti mán-jaiy men kúdiktilerdiń kinási sot sheshimimen ǵana anyqtalady.
