Almatydaǵy qurylys alańynda Ózbekstannan kelgen 30-dan astam gastarbaiter ustaldy. Bul týraly qalalyq politsiia departamentinen málim etti, dep habarlaidy "Ult aqparat".
Politsiia departamenti taratqan málimetke sáikes, kórshi memleketten kelgen kelimsekter qalanyń Alataý aýdanyndaǵy qurylys alańynda anyqtaldy. Sheteldiktiń jeke kýáligi bolmaǵan, osyǵan bailanysty, olar Politsiia departamentiniń qabyldap-taratý bólimine ornalastyryldy.
«Ustalǵandardyń árqaisysynyń kim ekenin anyqtaǵannan keiin, olardy qalamyzdyń aýmaǵynda kez kelgen quqyq buzýshylyqtar men qylmystarǵa qatystylyǵyn tekseremiz. Sodan keiin olar ákimshilik jaýapqa tartylyp, Qazaqstannan shyǵarylady. Aitpaqshy, ótken kúni Ózbekstan Respýblikasynyń Almaty qalasyndaǵy konsýldyǵymen birge sottyń sheshimimen buryn Qazaqstannan shyǵarylǵan Ózbekstannyń 16 azamatyn eline qaitarý jumysy uiymdastyryldy», – dedi Almaty qalalyq PD Kóshi-qon qyzmeti basqarmasynyń bastyǵy Ashat Býtýnchinov.
Sondai-aq spiker 7-16 maýsym aralyǵynda ótkizilgen «Kelimsek» is-sharasy barysynda 1 785 adam kóshi-qon zańnamasyn buzǵanyn anyqtady. Olardyń 1 262-si sheteldik. 102 sheteldik Qazaqstan Respýblikasynan shyǵaryldy, onyń toǵyzy azamattyq is júrgizý tártibimen.
«Sonymen qatar sheteldikterdiń Qazaqstan Respýblikasynda bolýynyń zańdylyǵyn qamtamasyz etý jónindegi sharalardy qabyldamaǵany úshin azamattardy qabyldaýshy 467 tulǵa jaýapqa tartyldy. Qazaqstan Respýblikasyna sheteldik jumys kúshin tartý erejelerin buzǵany úshin 56 jumys berýshige aiyppul salyndy. Sondai-aq is-shara ýaqytynda zańsyz kóshi-qon arnasyn uiymdastyrýdyń úsh faktisi anyqtaldy», – dedi politsiia ókili.
